Skenarët e përballjes së Beqirajt me drejtësinë, enigma e “gabimit” mbi zonën bërthamore

Çfarë pritet të ndodhë me Ermal Beqirajn pas arrestimit të tij në Francë dhe a do të ekstradohet në Shqipëri?

Procedurat e ekstradimit kanë startuar, por ekziston edhe mundësia që autoritetet franceze t’i japin përparësi hetimit për fluturimin mbi centralin bërthamor, përpara se të vendosin për kthimin e tij në Shqipëri.

Sipas mediave, para 2 javësh, drejtuesi i SPAK, Klodian Braho dhe drejtuesi i BKH-së janë takuar me shërbimet sekrete në Francë. Nëse kjo është e vërtetë, SPAK ka patur informacion për vendndodhjen e Ermal Beqirajt. Ai do dalë në orët në vijim përpara gjykatës. Nëse shpreh vetë vullnetin për tu rikthyer në Shqipëri, ai sillet në Tiranë për disa ditë. Nëse e kundërshton me avokat ekstradimin, procedura mund të shkojë mbi 40 ditë dhe më gjatë.

Por gjithçka mund të varet nga hetimi që po zhvillojnë autoritetet franceze për fluturimin mbi një zonë me infrastrukturë kritike. Nëse fluturimi konsiderohet thjesht gabim, ai do të përballet vetëm me gjobën rreth 7 mijë euro që është bërë tashmë e ditur.

Por nëse lindin dyshime të tjera, prioritet mund të jetë hetimi në Francë dhe jo ekstradimi.

Është interesant dhe dyshues iitinerari i fluturimit, duke patur parasysh se Beqiraj nuk ishte një pilot i rastësishëm. Si pronar i një kompanie që zotëron avionë privatë, i kërkuari për zhdukjen e miliona eurove nga AKSHI supozohet t’i njihte mirë korridoret ajrore, procedurat e fluturimit dhe zonat ku lejohen apo ndalohen kalimet.

Si rregull duhet të marrësh leje për ngritje nga pista dhe duhet të kesh një drejtim të caktuar. Një person që njeh territorin ka pasur dijeni lidhur me vendodhjen e atij centrali. Beqiraj është nisur nga pista dhe ka shkuar drejt bregdetit. Ka devijuar në Calais dhe kalon mbi zonën ku është TECI bërthamor. Në këtë moment është interceptuar nga avionët luftarakë francezë që i kanë bërë thirrje dhe kanë kërkuar uljen e mjetit duke bërë shoqërimin e tij. Sapo është ulur është bërë arrestimi.

Gjatë uljes janë gjetur tre Air Tags në trupin e tij. Janë kontrolluar udhëtimet e tjera që janë bërë me atë avion, është bërë kontrolli i Kutisë së Zezë se gjatë kohës që ka qenë në avion, Beqiraj mund të ketë folur nëpërmjet telefonit apo pajisjeve të tjera. Laptopët dhe telefonët, do tregojnë nëse ka patur bashkëpunëtorë nga toka apo jo, me kë ka folur dhe cili ka qenë qëllimi.

Por bën habi fakti që dikush që e njeh territorin dhe që ka marrë leje fluturimi, bën një gabim të tillë në itinerar.

Në cdo rast, nëse nga GPS-i, fotografitë apo skanimet e mundshme dalin prova që fluturimi ka qenë i qëllimshëm, atëherë hetimi në Francë mund të marrë përparësi ndaj ekstradimit në Shqipëri.

Beqiraj u arrestua të martën në veri të Parisit, pasi avioni i vogël privat me të cilin po fluturonte u interceptua nga avionët luftarakë francezë mbi centralin bërthamor të Penly. Gjatë verifikimeve rezultoi se ai ishte i shpallur në kërkim ndërkombëtar nga SPAK në kuadër të dosjes së AKSHI-t, ku akuzohet për gjashtë vepra penale bashkë me Ergys Agasin, edhe ky në kërkim.

o.p. / dita