Ministri i Transportit në Greqi, Miltiadis Varvitsiotis ka dhënë ditën e sotme dorëheqjen, disa ditë pas vdekjes së një pasagjeri i cili u shty me forcë nga një traget në Pireus javën e kaluar.
Varvitsiotis do të zëvendësohet nga Christos Stylianidis, i cili ka shërbyer si ministër i Krizave Klimatike dhe Mbrojtjes Civile në qeverinë e mëparshme të Kyriakos Mitsotakis.
Pamjet e incidentit të cilat u shpërndanë në mediat sociale, ngjallën zemërim në të gjithë vendin.
Në videon e publikuar shihej pasagjeri që përpiqej të hipte në tragetin “Blue Horizon” ndërsa përgatitej për t’u larguar dhe një anëtar i ekuipazhit e shtyn atë nga platforma në ujë.
Anëtarët e ekuipazhit nuk bënë asnjë përpjekje për të shpëtuar personin që ra në ujë dhe trageti vazhdoi rrugën e tij derisa u urdhërua të kthehej.
Varvitsiotis shprehu “tronditje, tmerr dhe pikëllim” për incidentin dhe e identifikoi viktimën si Antonis Karyotis, 36 vjeç. Por në një dalje televizive ai tha: “Sot, ka njerëz që vajtojnë për të humburit padrejtësisht; por edhe familjet e atyre që shkuan për të marrë një rrogë, një ditë dhe tani akuzohen për vrasje, janë në zi”.
Deklarata ngjalli zemërim dhe indinjatë tek njerëzit që u shprehën se ministri dukej se po barazonte personin e ekuipazhit me viktimën. Varvitsiotis u përpoq të sqaronte se ai donte të thoshte diçka ndryshe nga ajo që kuptonin të gjithë. Në fund, ai kërkoi falje, por kritikat nuk u ulën.
“Në ditët e fundit jam bërë objektiv i një sulmi që po merr gjithnjë e më shumë karakteristika toksike. Një deklaratë e imja që u keqinterpretua lehtësisht shkaktoi zemërim. Menjëherë kërkova falje sinqerisht. Në asnjë mënyrë nuk e barazova viktimën me autorët. Në asnjë mënyrë nuk kam hequr përgjegjësitë që ka kompania pronare e anijeve, të cilat ajo ende refuzon t’i marrë”, tha ai në një deklaratë ku njoftoi dorëheqjen e tij.
“Karriera ime politike dhe dinjiteti im personal më diktojnë që të mos qëndroj në postin e Ministrit të Transportit dhe Politikës Ishullore. Për këtë arsye i paraqita dorëheqjen kryeministrit”, shtoi ai.
Dorëheqja e Varvitsiotis është e dyta për qeverinë e Mitsotakis në më pak se dy muaj, pasi Notis Mitarakis dha dorëheqjen nga Ministri i Mbrojtjes së Qytetarëve për pushime në një jaht në ishullin Patmos, ndërsa zjarret e mëdha po shkatërronin Athinën.
Βίντεο σοκ: Το πλήρωμα έσπρωξε από το Blue Horizon στον θάνατο τον 36χρονο που σκοτώθηκε στο λιμάνι Πειραιά pic.twitter.com/FdzFTliZLg
— kakajason (@kakajason50) September 5, 2023
j.l./ dita
