Elon Musk ka shkaktuar një valë zemërimi dhe polemikash pas gjestit që bëri gjatë fjalimit në festën e inaugurimit të Donald Trump, në Capital One Arena në Uashington DC.
Musk, që është njeriu më i pasur në botë dhe një aleat i ngushtë i Trump, falënderoi turmën për mbështetjen e tyre, duke thënë: “Zemra ime është për ju. Është falë jush që e ardhmja e qytetërimit është e garantuar.” Pas kësaj, ai vendosi dorën e djathtë mbi zemrën e tij dhe më pas e ngriti krahun drejt përpara, duke e përsëritur këtë veprim dhe për ata që ishin ulur pas tij.
Gjesti i Musk ka shkaktuar reagime të forta në rrjetet sociale, duke u krahasuar me një përshëndetje naziste, e njohur si “Sieg Heil”.
Historianët dhe ekspertët kanë reaguar menjëherë. Claire Aubin, një historiane që merret me hetimin e nazizmit, e cilësoi përshëndetjen si të qëllimshme dhe element i regjimeve fashiste.
Ndërkohë, Andrea Stroppa, një mik i ngushtë i Musk, i cili ka lidhje me politikën italiane të ekstremit të djathtë, postoi një video të gjestit të Musk, duke e quajtur atë një “përshëndetje romake”, e cila ka qenë gjerësisht e përdorur nga Partia Fashiste e Benito Musolinit dhe më vonë nga Adolf Hitleri. Pas kritikave, Stroppa e fshiu postimin dhe kërkoi të shpjegonte se Musk kishte shprehur “ndjenjat e tij” përmes gjestit, duke shtuar se ai vuan nga autizmi dhe se nuk ka asnjë lidhje me ekstremizmin.
Megjithatë, një pjesë e madhe e mediave dhe individëve kanë mbrojtur Musk. Lidhja Anti-Shpifje, një organizatë që lufton antisemitizmin, tha se gjesti i Musk ishte thjesht një moment i sikletshëm dhe jo një përshëndetje naziste.
Gjesti i Musk vjen pas një periudhe kur ai ka shprehur hapur mbështetje për partitë e ekstremit të djathtë, si AfD në Gjermani dhe Partia Reforma në Britani.
Për këtë incident, Musk ka reaguar në X (platformën e tij të mediave sociale), duke i quajtur akuzat si “mashtrime” dhe duke shtuar se ata që e krahasuan gjestin me një përshëndetje naziste po përdornin një “taktikë të vjetër” për ta sulmuar.
j.l./ dita
