Policia e Shtetit ka vënë në pranga dy shtetas shqiptarë me rrezikshmëri të lartë shoqërore, të shpallur në kërkim ndërkombëtar nga autoritetet italiane, për një sërë veprash penale të rënda.
Në prangat e policisë përfunduan shtetasit Klodian Llomi (Mazari), 34 vjeç, banues në Maqellarë të Dibrës.
Ky shtetas është dënuar nga Gjykata e Apelit në Romë, në vitin 2023, me 6 vjet, 7 muaj e 2 ditë burgim, për veprat penale: “Organizatë kriminale”, “Trafikim i lëndëve narkotike” dhe “Shfrytëzim prostitucioni”.
Gjithashtu u arrestua dhe Roland Ibrahimi, i njohur edhe me emrin Ali Meci, 40 vjeç, banues në Laç. Gjykata e Torinos e ka dënuar atë në vitin 2024 me 4 vjet e 3 muaj burgim, për veprat penale: “Organizatë kriminale”, “Grup kriminal” dhe “Vjedhje e rëndë”.
Arrestimet janë realizuar në kuadër të operacionit policor të koduar “Operacionalja”, i cili po vijon në disa qytete të vendit për kapjen e personave në kërkim ndërkombëtar.
Faza 39 e operacionit u finalizua në Dibër, ku u arrestua Klodian Llomi, ndërsa faza e 40-të u zhvillua në Fushë-Krujë, duke çuar në ndalimin e Roland Ibrahimit.
Të dy shtetasit do t’i nënshtrohen procedurave të ekstradimit drejt Italisë.
i.b./dita
