Këtë të hënë Gjykata e Posaçme e Apelit, ka lënë në fuqi vendimin e Shkallës së Parë për grupin e dënuar të laboratorit të drogës në Frakull të Fierit, ku u gjet dhe u sekuestrua 485 kilogramë kokainë.
Vendimi i dhënë nga GJKKO në qershor të këtij viti u ankimua nga Enxhi Ferhati, Bledar Matoshi, Nikolin Gjolena, Viktor Çervanaku, Denilson Çervanaku, Zenel Çervanaku, Klajdi Vrioni, Redion Meshi dhe Marildo Rona.
Apeli la në fuqi dënimin me 89 vite burg për 10 pjestarët e grupit të laboratorit të kokainës në Frakull të Fierit. Në dënimet e dhëna u aplikua gjykimi i shkurtuar. Julian Malaj i cili u dënua me 2 vite burg nga Shkalla e Parë u lirua nga qelia për shkak të kohëzgjatjes së qëndrimit në paraburgim.
Hetimet u kryen nga ana e prokurorit Adnan Xholi, që njihet si dora e hekurt kundër bandave në Prokurorinë e Posaçme, për shkak të dënimeve të forta dhe dosjeve të kopsitura të krimit VIP në Shqipëri.
Për këtë grup, Xholi kërkoi plot 139 vjet burg me dënime deri në 18 vjet për anëtarët kryesorë. U aplikua gjykimi i shkurtuar.
Nga hetimet rezultoi se të pandehurit, në bashkëpunim me njëri tjetrin, në formën e grupit të strukturuar kriminal, planifikuan, organizuan dhe importuan nga Kolumbia për në Shqipëri ngarkesën e drogës.
Kokaina ishte fshehur mes “plehut organik” artificial, e paketuar dhe ngarkuar në një kontenier, që u transportua nga Kolumbia nëpërmjet Portit të Pireut në Greqi, në drejtim të Portit në Bar, në Malin e Zi.
Më pas, në rrugë tokësore ngarkesa u fut në Shqipëri në datën 19.09.2022 dhe pasi u zhdoganua në Tiranë, u transportua në fshatin Frakull e Madhe, në Fier, ku u bë dhe sekuestrimi i lëndës narkotike nga policia gjyqësore.
Banesa ku u zbulua laboratori i kokainës, ishte në pronësi të ish-kryetarit të komunës së Farkullit, Viktor Çervanakut, i cili do vuajë 10 vite burg.
Dënimet e kërkuara nga prokurori Xholi dhe dënimet e gjykimit të shkurtuar, lënë në fuqi edhe nga Apeli i GJKKO:
-Nikolin Gjolena 18 vite / 12 vite gjykim i shkurtuar
-Viktor Çervanaku 16 vite / 10 vite e 8 muaj
-Denilson Çervanaku 18 / 12 vite
-Klajdi Kodra 18 / 12 vite
-Zenel Cervanaku 15 / 10 vite
-Enxhi Ferhati 12 / 8 vite
-Redion Meshi 15 / 10 vite
-Bledar Matoshi 12 vite e 6 muaj / 8 vite e 4 muaj
-Marildo Rona 12 / 8 vite
-Julian Malaj 3 / 2 vite
j.l./ dita
