Rexhep Tayyip Erdogan, i cili fitoi një mandat të tretë në zgjedhjet presidenciale turke, njoftoi përbërjen e qeverisë së re pasi u betua për një mandat të ri pesëvjeçar si kreu i Turqisë. Pas një darke zyrtare ku morën pjesë pothuajse 80 presidentë shtetesh dhe qeverish, Erdogan shpalli përbërjen e qeverisë së re në të cilën ministritë e mbrojtjes, të punëve të jashtme dhe të ekonomisë pësuan ndryshime të thella.
Qeveria e re do të mblidhet për herë të parë të martën, tha ai më herët. Pas darkës, Erdogan shkoi në pallatin presidencial Cankaya, ku jetonte dhe punonte Mustafa Kemal Ataturk, për të shpallur përbërjen e qeverisë së re. Siç pritej, eksperti i njohur Mehmet Simsek, ish-ministër i Financave (2009-2015) dhe më pas Zëvendëskryeministër për Politikat Ekonomike (deri në 2018), merr Ministrinë e Financave.
Emri i Mehmet Simsek, 56 vjeç, u shfaq vazhdimisht në media: ish-ekonomisti i bankës amerikane Merrill Lynch do të jetë përgjegjës për të vendosur rregull në politikën financiare të vendit për të rifituar besimin e investitorëve.
Ministritë kryesore do të rinovohen gjithashtu: kështu Hakan Fidan, ish-kreu i MIT, shërbimi inteligjent turk, do të marrë postin e ministrit të Jashtëm, në vend të Mevlut Çavusoglu. Në Ministrinë e Mbrojtjes, Yasar Gueler, shefi i Shtabit të Përgjithshëm të Forcave të Armatosura, zëvendëson Hulusi Akar, ish-shefin e Shtabit të Përgjithshëm që mbante këtë post që nga korriku 2018.
Akar u konsiderua organizatori i rezistencës ndaj grushtit të shtetit të dështuar në korrik 2016. Në postet e tyre kanë mbetur vetëm dy ministra, Shëndetësia dhe Kultura.
