Presidenti i Turqisë, Recep Tayyip Erdogan, i ka bërë thirrje Greqisë të ndryshojë qëndrim dhe t’i japë fund asaj që Ankaraja e konsideron militarizim të ishujve të Egjeut.
Kjo çështje mbetet një prej pikave të mosmarrëveshjeve mes Turqisë dhe Greqisë, përfshirë edhe interpretimin e traktateve ndërkombëtare që përcaktojnë statusin e ishujve.
Në një intervistë për gazetën greke “Kathimerini”, pas kthimit nga Bishkeku i Kirgistanit, ku mori pjesë në samitin e Organizatës së Bashkëpunimit të Shangait, Erdogan deklaroi se Turqia nuk ka pretendime territoriale ndaj vendeve të tjera.
“Turqia nuk ka ambicie për territorin e askujt, por nuk do të lejojë askënd të shkelë të drejtat e saj”, u shpreh presidenti turk.
Erdogan i bëri thirrje Athinës të heqë dorë nga ajo që ai e përshkroi si “rrugë e gabuar” dhe të respektojë traktatet ndërkombëtare.
Sipas presidentit turk, mosrespektimi i marrëveshjeve mund të sjellë pasoja për stabilitetin e rajonit.
Erdogan foli gjithashtu për qëndrimin e Ankarasë ndaj Greqisë, duke theksuar se qasja e kujdesshme e Turqisë nuk duhet të perceptohet si shenjë dobësie.
“Kushdo që e interpreton qasjen e qetë dhe racionale të Turqisë si dobësi, po bën një gabim serioz”, tha Erdogan.
Çështja e ishujve të Egjeut, statusi i tyre dhe interpretimi i traktateve ndërkombëtare vijojnë të jenë ndër temat e ndjeshme në marrëdhëniet mes Turqisë dhe Greqisë.
j.l./ dita
