Një foto e postuar online tregon një gjeneral rus, i cili nuk është parë në publik që nga rebelimi i grupit mercenar Wagner, në qershor.
Sergei Surovikin thuhet se ka qenë i afërt me shefin e Wagner, Yevgeny Prigozhin, i cili vdiq në një aksident avioni muajin e kaluar.
Ka pasur raporte se gjenerali Surovikin është duke u hetuar për bashkëpunim të mundshëm në kryengritje.
Por një foto që pretendon se tregon ish-komandantin rus në Ukrainë është publikuar tani në rrjetet sociale.
“Gjenerali Sergei Surovikin është jashtë. I gjallë, i shëndetshëm, në shtëpi, me familjen e tij, në Moskë. Foto e bërë sot”, shkroi personazhi i njohur i medias ruse Ksenia Sobchak në një mbishkrim mbi foton në Telegram të hënën.
BBC nuk e ka verifikuar ende vërtetësinë e fotos, e cila tregon një burrë me syze dielli duke ecur krah për krah me një grua flokëkuqe, që i ngjan gruas së gjeneralit, Anna.
Gazetari rus Alexei Venediktov shkroi veçmas në Telegram: “Gjenerali Surovikin është në shtëpi me familjen e tij. Ai është në pushim dhe në dispozicion të ministrisë së mbrojtjes.”
Mercenarët e Wagner-it tentuan një rebelim të shkurtër më 23 dhe 24 qershor, duke kërcënuar se do të marshonin drejt Moskës.
Prigozhin dhe nëntë të tjerë u vranë në përplasjen pranë Moskës më 23 gusht, gjë që çoi në spekulime të furishme. Shefi i Wagner u përshkrua nga shumë njerëz si një “i vdekur që po ecte” pas rebelimit të dështuar.
Gjenerali Surovikin ishte parë për herë të fundit në publik në një video gjatë rebelimit duke u kërkuar forcave Wagner që të ndalonin veprimet e tyre.
j.l./ dita
