FAKSIMILE: U tha “zero lekë”, firmosen 4.2 milionë euro për Kanye West! Kryeministri blen me paratë e emergjencave imazhin e rinisë “së lumtur” ndërsa sheshi zien

Nga Migena Aleksi

Publikimi i Aktit Normativ Nr. 3 zbulon një skandal që shkon përtej arbitraritetit dhe papërgjegjshmërisë. Një atentat i hapur ndaj Kushtetutës. Qeveria ka kaluar 400 milionë lekë nga Fondi Rezervë i emergjencave për koncertin privat të reperit Kanye West, duke shkelur flagrant Nenin 101 që kërkon urgjencë dhe nevojë të jashtëzakonshme. Për më tepër, ky financim nuk është rastësor. Ai vjen si një kundërpërgjigje ndaj protestave masive. Pasi dështoi të injoronte sheshin me postime cinike, Kryeministri po përdor paratë e popullit për të krijuar vatra artificiale “argëtimi” si anestezik social.

Ky vendim i firmosur nga Rama që sapo është bërë publik dhe po qarkullon në media nuk është vetëm i pamoralshëm. Është një tjetër atentat i hapur ndaj Kushtetutës së Republikës.

Janë kaluar 400,000,000 lekë (afro 4 milionë euro) nga Fondi Rezervë (!) për koncertin e një reperi të huaj. Në dokument citohet Neni 101 i Kushtetutës.

Kushtetuta e përcakton qartë se Aktet Normative me fuqinë e ligjit 101 mund të nxirren vetëm në kushte emergjence, duke plotësuar tre kritere kumulative, të cilat janë: Nevojë e jashtëzakonshme. Urgjencë. Masë e përkohshme!

Ku qëndron nevoja e jashtëzakonshme dhe urgjenca kombëtare në koncertin e një reperi? A mos rrezikohet siguria kombëtare, stabiliteti ekonomik apo shëndeti publik?

Fondi Rezervë i shtetit ekziston për fatkeqësi natyrore dhe për kriza që kërcënojnë jetën e qytetarëve.

Por pse fillimisht u deklarua se shteti do të investonte “0 lekë” dhe vetëm pak ditë para koncertit del ky Akt Normativ?

Nuk është vetëm shpërdorim i pastër i parasë publike. Në kontektsin e protestave masive ky vendim nuk është rastësor.

Nuk ka kaluar shumë nga një postim cinik i Kryeministrit në rrjetet sociale, ku përmes një kolazhi fotografik krahasohej pjesëmarrja në një “Fun Zone” festive me numrin e qytetarëve në protestë (!) Duke tentuar edhe njëherë të injorojë me arrogancë qesharake zërin e një sheshi që mbushet sa nuk ka më ku të shkojë.

Por sot, pas publikimit të këtij Akti Normativ kuptohet që ky krahasim nuk ishte një kunjë e zakonshme e kryeministrit tonë batutaxhi.

Ai po kërkon të krijojë imazhin paralel të një rinie që “zbavitet”, me qëllim që të mbysë zhurmën e rinisë që proteston nëpër sheshe. I duhen vatra artificiale argëtimi, “Fun Zones” dhe koncerte me përmasa faraonike pikërisht në këtë moment, që të na i shërbejë si anestezik social.

Dhe për këtë po përdor madje paratë e Fondit Rezervë!

Ana tjetër e medaljes është që ndërsa qeveria firmos brenda natës miliona euro për të paguar logjistikën e një ylli botëror, kultura e vërtetë kombëtare lëngon në mungesa. Libri shqip, botimet shkencore, autorët vendas dhe institucionet kulturore që mbajnë gjallë identitetin tonë përballen me thërrime apo me buxhete zero.

Arsimi dhe bibliotekat zbrazen, ndërsa kryeministri ynë “socialist” shndërrohet në një mecenat bujar për një industri argëtimi komerciale.

Por synimi i kësaj industrie të kushtueshme marketingu politik është i qartë. Të na ofrohet peizazhi i një rinie të lumtur e të shkujdesur, duke e paraqitur revoltën qytetare si një “anomali”.

Njerëzit në sheshin e protestës dalin të shtyrë nga dinjiteti dhe vështirësitë e jetesës. Të shpenzosh miliona euro për të treguar një rini që kërcen nën ritmet e një ylli ndërkombëtar, ndërkohë që ajo rini është derdhur në sheshe duke kërkuar çmontimin e një sistemi të korruptuar, këtë vetëm dikush totalisht i shkëputur nga realiteti, mund të ketë kurajon ta bëjë.

Pak të thuash TURP!

Dita