Nuk ka kush e ndal. Gjithmonë bie në këmbë. Sevilla konfirmon se është e bekuara e Europa League, kompeticioni që s’e ka humbur asnjëherë në finale dhe trofeu i shtatë europian. Një Real në modelin Champions. Madje as Murinjo nuk ia doli dot, megjithëse e pati mundësinë.
Pjesa e parë u mbyll 1-0 me gol të Dybalës dhe e dyta nisi me një barazim fal autogolit të Mançinit. Pjesa tjetër ishte histori. Shtesë dhe rekord kartonësh të verdhë, 10 në total, 6 për Romën dhe 4 për spanjollët.
Raste të shumta, emocione, por në fund si gjithnjë Sevilla, fal portierit më në formë nga 11-metrat, marokenit Bonno. Ai çoi Marokun në gjysmëfinalet e Botërorit, po ai Sevilla-n drejt trofeut të Europa League.
Sevilla fiton EL pas penalltive kundër Romës. 4-1 trimfuan spanjollet nga pika e bardhë. Italianët gabuan shumë dhe fundi ishte i hidhur. Nuk shënuan dot Mançini dhe Ibanez, teksa portieri Bonno i priti të dyja dhe njëra përfundoi te shtyllat. Kurse heroi ka qenë argjentinasi Montiel, që pasi i dha Botërorin Argjentinës në penalltinë e fundit më 20 dhjetor ndaj Francës, ekzekutoi të përsëritur penalltinë e fundit për Sevilla, pasi të parën e çoi traversë dhe gjyqtari e përsëriti sepse Rui Patricio lëvizi para kohe.
