Me avancimin e teknologjisë, bota është bërë gjithnjë e më shumë e pasigurtë. E thënë ndryshe, informacionet që po prodhohen në internet duhen parë gjithnjë e me më shumë skepticizëm, nëse janë reale apo jo.
Fotoja më lart fitoi javën e kaluar një prej çmimeve më prestigjioze, “Sony World Photography”, por artisti ka refuzuar që ta pranojë. Arsyeja? Sepse kjo foto nuk është origjinale, por është krijim i inteligjencës artificiale. E keqja është se këtë, askush nuk e kuptoi.
Artisti gjerman Boris Eldagsen e tregoi vetë që përdori këtë imazh për të testuar konkurencën, si dhe për të ndezur një diskutim për të ardhmen e fotografisë.
Me anë të një reagimi, autori shtroi pyetjen “nëse ndonjë nga anëtarët e jurisë kuptoi që fotoja ishte produkt i inteligjencës artificiale”.
“Imazhet e AI (Artificial intelligence) dhe fotografia origjinale nuk duhet të konkurrojnë me njëra-tjetrën në një çmim si ky. Ato janë entitete të ndryshme. AI nuk është fotograf. Prandaj nuk do ta pranoj çmimin”, tha ai.
Organizatorët e eventit pranuan padijeninë dhe thanë se çmimet “gjithmonë kanë qenë dhe do të vazhdojnë të jenë një platformë për të përkrahur përsosmërinë dhe aftësinë e fotografëve dhe artistëve që punojnë në terren”.
Për më tepër, kjo nuk është hera e parë që një produkt i inteligjencës artificiale fiton një çmim në një konkurs fotografie. Hera e fundit ndodhi në SHBA, shtatorin e kaluar.
Kjo ka rindezur një debat shumë të fortë. Shumë artistë dhe fotografë akuzojnë sistemet e inteligjencës artificiale për shfrytëzim të padrejtë të veprave të mijëra krijuesve njerëzorë, madje kanë nisur veprime ligjore.
Mirëpo, të tjerë thjesht e konsiderojnë inteligjencën artificiale si një mjet të ri, një kategori të re arti, jo më pak të vlefshme se puna njerëzore.
j.l./ dita
