Një numër i lartë zyrtarësh dhe politikanësh shqiptarë kanë rënë pre e vjedhjeve në banesat e tyre përgjatë viteve të fundit.
Karakteristikë e këtyre rasteve ka qenë se shumica e tyre nuk janë denoncuar. Shkaku ka qenë skandali që do pasonte me pyetjen e pashmangshme: Ku u gjetën paratë që janë vjedhur?
Me përjashtin të rasteve si ajo e ish-zyrtares që kishte fshehur mbi gjysëm milion euro në tubat e ajrimit të kuzhinës dhe ndonjë rasi tjetër, shumica e këtyre vjedhjeve ka mbetur e fshehur.
Raste tipike janë regjistruar në vilat e Gjirit të Lalzit dhe në rezidencat e luksit në Tiranë.
DITA mëson se prova për shumë prej këtyre rasteve gjenden edhe në komunikimet e rrjetit SKY që gjenden aktualisht në duart e prokurorëve të SPAK pas zbërthimit të këtij aplikacioni nga hetuesit francezë.
Një nga krerët e krimit shqiptar aktualisht i burgosur ka qenë truri i një serie vjedhjesh në banesa të ministrave dhe emrave të njohur politikë për të cilët kishte ibënformacion se fshihnin sasi të madhe paraje kesh në banesa.
Një rast i raportuar ka qenë ai i vjedhjes së një prej banesave të shumta të çiftit Jamarbër Malltezi – Argita Berisha. Malltezi aktualisht është në arrest shtëpiak për aferën e klubit Partizani, kurse vajza e ish-kryeministrit Berisha përflitet se ka ambicie të pasojë babanë në politikë.
Një investigim i medias greke ka zbuluar se një i arratisur nga burgu i Trikalas, ka qenë implikuar në grabitjen e banesës së Argita Malltezit në Tiranë. Real News, një gazetë e përjavshme në Greqi, shkruan se grabitja ka ndodhur disa kohë më parë dhe sipas identifikimit të policisë shqiptare, një prej grabitësve ka qenë Fatos Sylaj, i cili ishte arratisur me dhjetë të tjerë nga burgu i Trikalas në Greqi.
DITA raporton numrin e sotëm detaje për vjedhjen në banesën e çiftit Malltezi, ku sipas citimeve të policisë greke, hajdutët kishin hyrë nga pjesa e prapme dhe kanë marrë një sasi të konsiderueshme parash dhe bizhuteri.
Sipas policisë, Sylaj akuzohet për të paktën 30 grabitje të gjitha në banesa personash të akuzuar për korrupsion.
Ai u arrestua në Tiranë, pas dyshimeve se ishte fshehur në Kosovë.
Policia raporton se disa grupe të tjerë kryejnë të njëjtin aktivitet që ka vënë në shënjestër banesa politikanësh dhe zyrtarësh në gjithë rajonin, si dhe banesa biznesmenësh të lidhur me ta.
Një tjetër grup u zbulua së fundmi. Autorët kanë marrë para dhe ar me vlerë të madhe, si dhe kasaforta. Sipas njoftimit të policisë, ata kishin marrë para të gatshme 17.810 euro dhe bizhuteri në vlerë prej 437.961 euro.
Në foto kryesore, pamje nga rasti i sipërpërmendur. Lart, Sylaj, poshtë çifti Malltezi – Berisha
