Ish-presidenti i Venezuelës, Nicolás Maduro, ka publikuar në rrjetin social X disa fotografi nga vendi ku mbahet i arrestuar në Nju-Jork që prej 3 janarit. Në imazhet e realizuara gjatë muajit qershor, ai shfaqet me kostum sportiv gri, duke buzëqeshur dhe duke bërë shenjën e fitores.
Maduro i ka cilësuar këto foto si një “dhuratë dashurie dhe shprese” për familjarët dhe mbështetësit e tij. Përmes mesazhit shoqërues, ai ka falënderuar ndjekësit për lutjet dhe solidaritetin, duke siguruar se mbetet i palëkundur.
“Një Dhuratë e Vogël Dashurie dhe Shprese. I dërgoj këto foto si një dhuratë të vogël për të gjithë nipërit dhe mbesat e mia, për djemtë dhe vajzat, dhe për të gjithë njerëzit fisnikë që na duan. Dua që ta dini se ne qëndrojmë të palëkundur, me zemrat plot me dashurinë tuaj, atë dashuri që na arrin të transformuar në lutje, në veprim të vazhdueshëm, në solidaritet dhe mbështetje të vërtetë. Falënderime të pafundme për çdo fjalë, për çdo gjest, për çdo bekim.”, shkruan Maduro.
Ai po ashtu ka përcjellë përqafimet e tij dhe të bashkëshortes, Cilia Flores, ndërsa ka cituar me besim edhe Letrën drejtuar Romakëve nga Dhjata e Re. Maduro vijon të qëndrojë në paraburgim në SHBA pas arrestimit të tij gjatë një operacioni ushtarak amerikan në Venezuelë në fillim të këtij viti.
j.l./ dita
