Luna ka dy sy të mençur dhe një elegancë mahnitëse që të bën menjëherë për vete. Tashmë është bërë shumë e njohur dhe gati e pazëvendësueshme në radhët e vullnetarëve të Shërbimit të Kërkim-Shpëtimit Malor të Shqipërisë që ndihmojnë operacionet e Emergjencave Civile.
Para disa muajsh u gjet e braktisur në rrugë nga Geri Hoxha, një djalë i ri me profesion mekanik që jeton dhe punon në Tiranë. Geri është pjesë e Shërbimit të Kërkim Shpëtimit Malor që funksionon në kuadër të Federatës së Alpinizmit dhe Turizmit Malor.
Ai është pjesëmarrës në disa nga operacionet më të vështirë të Emergjencave, ku tashmë merr pjesë edhe Luna.
“Isha duke ecur me makinë në një zonë afër Liqenit të Kasharit. E pashë në anë të rrugës në një kanal. Kuiste. Zbrita. Ishte me këmbë të thyer dhe kockë e lëkurë. Sapo u afrova e mbështeti kokën te këmbët e mia duke më parë në sy. Hapa derën e pasme të makinës dhe mendova: Nëse hyn vetë brenda, do ta marr. Nëse jo, do largohem. Hyri duke çaluar dhe u mblodh kruspull në sedilje pa m’i shqitur sytë. Prej asaj dite nuk jemi ndarë më” – tregon Geri për gazetën DITA.
Luna më pas u trajnua dhe u bë pjesëtare e grupeve vullnetare të Emergjencave. Ajo u tregua vendimtare në rastin e turistes gjermane, e cila ra nga lartësitë e Thethit disa javë më parë. Ekipi i vullnetarëve nuk mundi ta gjente megjithë orët e gjata të kërkimeve në një terren shumë të vështirë. Në fund, e lokalizoi dhe e gjeti Luna.
Ajo e ndan tani kohën e saj mes angazhimit me ekipin e SHKSHM dhe oficinës së Gerit, ku sapo e shikon, është e pamundur të mos tërhiqesh menjëherë nga vështrimi dhe sjellja e saj.
Luna sapo është bërë nënë e dy të vegjëlve të mrekullueshëm që janë adoptuar nga një gazetar i cili jeton në një zonë të izoluar të rivierës shqiptare.
VIDEO:
—–
© Copyright Gazeta Dita 2024. Të gjithë të drejtat e rezervuara
Geri je shpirt njeriu, ke bere nje gjest te mrekullueshem, Luna eshte dhe do te jete besnikja jote , qeni eshte mirenjohes , mbaje njeriun nje jete te tere ne sherbim dhe nuk vlereson.
ja u befte Zoti mbare
Një gjest shumë njerëzor që të prek në shpirt! Ka akoma njerëz me ndjenja…bravo! Vit të mbarë ju uroj!
Te lumte Geri! Njerez si ju jane te rralle. Kalofsh nje vit te gezuar e me shendet bashke me Lunen! Respekte!
Qenit do t’i shkonte me shume emri shqiptar Hena, sesa emri italian Luna.
Te lumte Geri. Te marrin shembull nga ty edhe te rinjte e tjere shqiptare.
Geri, Zotri,njeri…ke bër mrekulli tani Luna vazhdon misionin tëndë së bashku me Ty, Zoti të ruejt !
Ti Geri rrofsh 100 vite,me shendet, lumturi,force dhe energji,sepse ke shpetuat,rritur e stervitur nje qenie fisnike,besnik dhe humane. Un do te konsideroja njeriu e vitit dhe Lunan nje krijese te mrekullueshme! Bravo! Shqiperise i Duhen njerez si ti dhe besnik e fisnik ,si Luna.GEZUAR!