Përmes një deklarate të përbashkët, Franca, Gjermania dhe Polonia kanë bërë thirrje për progres sa i përket çështjes së liberalizmit të vizave për Kosovën.
“Ne bëjmë thirrje për progres në lidhje me liberalizimin e vizave për Kosovën. Vendet tona janë të përkushtuara fuqishëm ndaj Procesit të Berlinit si një mjet shtesë për të nxitur bashkëpunimin rajonal dhe anëtarësimin në BE të vendeve të Ballkanit Perëndimor”, thuhet në deklaratën e 16 shtatorit.
Në deklaratë, vihet theksi tek dialogu mes Kosovës dhe Serbisë, ndërsa thuhet se është e rëndësishme që të arrihet një marrëveshje mes tyre, pasi është e nevojshme për përparimin e rrugëtimit të tyre europian.
“Ne e mbështesim plotësisht dialogun Kosovë-Serbi të udhëhequr nga BE-ja dhe theksojmë nevojën për një marrëveshje gjithëpërfshirëse që i lejon Kosovës dhe Serbisë të përparojnë në rrugët e tyre evropiane dhe të kontribuojnë në stabilitetin në rajon”, vazhdon deklarata e përbashkët.
Liderët e Francës, Gjermanisë dhe Polonisë kanë rënë dakord që të zhvillojnë një vizitë në Ballkanin Perëndimor. Kosova është shteti i vetëm në Ballkanin Perëndimor që nuk ka liberalizim vizash me Bashkimin Europian.
a.m/dita
