Irani deklaroi këtë të hënë se nuk po kërkon të përshkallëzojë konfliktin në Lindjen e Mesme, por theksoi se armiku i tij kryesor, Izraeli, duhet të “dënohet”. Deklaratat u bënë nga ministria e jashtme e vendit, në një kohë kur frika për përshkallëzimin e konfliktit është tepër e madhe.
Vendet perëndimore u kanë kërkuar të afërmve të diplomatëve në Liban, të tërhiqen nga vendi nga frika e një zgjerimi të konfliktit.
Zyra e Jashtme e Mbretërisë së Bashkuar tha se për shkak të një “situate sigurie shumë të paqëndrueshme” në Liban mes tensioneve në rritje midis Izraelit dhe grupeve militante të mbështetur nga Irani, Hezbollah dhe Hamas, të afërmit e punonjësve të ambasadës britanike në Bejrut do të largohen.
Gjatë fundjavës, Sekretari i Jashtëm britanik David Lammy u bëri thirrje shtetasve të Mbretërisë së Bashkuar që të largohen menjëherë nga Libani pasi pasojat e një konflikti më të gjerë në rajon “mund të jenë katastrofike”.
Ndërkohë grupi militant libanez, Hezbollah, tha se ka kryer këtë të hënë një sulm me dronë në veri të Izraelit.
Ky sulm vjen në kohën kur është rritur frika për një konflikt rajonal, pasi javën e kaluar u vra një komandant i lartë i Hezbollahut në Liban, dhe në Iran u vra udhëheqësi politik i Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian.
Përmes një njoftimi, Hezbollahu, që mbështetet nga Irani, tha se ka shënjestruar një bazë ushtarake në veri të Izraelit në përgjigje të “sulmeve dhe vrasjeve” të kryera nga Izraeli në disa fshatra në jug të Libanit.
Sulmi nuk duket se është pjesë e një kundërpërgjigje të ashpër që pritej lidhur me vrasjen e komandantit të Hezbollahut, Fouad Shukur në Bejrut javën e kaluar, shkruan REL.
Ushtria izraelite tha se shërbimet e zjarrfikësve po punojnë që të shuajnë zjarrin që shpërtheu si pasojë e sulmit në Ajelet Hashahar.
Izraeli dhe Hezbollahu kanë këmbyer zjarr pothuajse në baza ditore që kur ka nisur lufta në Gazë mes Izraelit dhe Hamasit më 7 tetor.
Vrasja e shefit politik të Hamasit, Ismail Haniyeh, javën e kaluar në Teheran të Iranit dhe vrasje e komandantit të Hezbollahtu, Fouad Shukur, në Bejrut kanë rritur tensionet në rajon, përderisa Izraeli po bëhet gati për një kundërpërgjigje nga Irani dhe milicitë aleate të tij.
j.l./ dita
