Geri Kokalari: SPAK nuk reagon kur u nis materiale për Berishën. La Civita dhe non grata? Po luhet pará e madhe

Aktivisti shqiptaro-amerikan Geri Kokalari në një intervistë në Report Tv flet mbi ardhjen e Chris Lacivita në Tiranë dhe angazhimin e tij në fushatën e Berishës. Kokalari vë në dukje se e vetmja gjë që e ka sjellë z.Lacivita në Tiranë janë paratë dhe shuma sipas tij e paguar për konsulencën në fushatë duhet të jetë e majmë.

Kokalari po ashtu komenton edhe zgjedhjet e pritshme në 11 Maj, ku pohon se i duket e pakuptimtë që Berisha u lirua për fushatës, ndërsa u burgos kryebashkiaku Erion Veliaj.

Ai komenton edhe “projektin” e Berishës për një ligj antiSoros, ku nënvizon se e gjitha është një shfaqje, pasi sipas tij njerëz pranë Trump kanë bashkëpunim të ngushtë me Sorosin.

Në fund të intervistës, Kokalari flet edhe për marëdhëniet e pritshme të Shqipërisë me SHBA nën administratën Trump.

Dua t’ju bëj pyetjen e parë sepse e pashë artikullin tuaj në gazetën DITA. Çfarë mendoni për situatën në Shqipëri? Jemi rreth 2 muaj para zgjedhjeve të përgjithshme…

Mendoj se Berisha po përpiqet sërish të rrëmbejë pushtetin. Mendoj se ai i ka bërë mjaftueshëm dëm Shqipërisë. Unë mendoj se ai duhet të shkojë. Unë nuk mendoj se ai duhet të jetë në një pozicion pushteti.

Është shumë e dyshimtë që SPAK e liroi Sali Berishën pikërisht në momentin që fillonte fushata zgjedhore dhe në të njëjtën kohë e futën Veliajn në burg. Kjo është shumë e dyshimtë për mua.

Nuk më duket e drejtë mungesa e akuzave për të. Kemi vitin 1997. Kemi privatizimin që ai u përpoq të bënte me Rezart Tacin. Kemi marrëveshjen me armët, municionet ilegale që i shitën qeverisë amerikane. Kemi një marrëveshje toke (Porto Romano) që lidhet me familjen e tij. Ka kaq shumë akuza. Po flasim për mbi 1 miliard dollarë mashtrim.

Dhe ndërkohë po hetojnë Erion Veliajn për disa fatura karte krediti për gruan e tij. Nuk e di se çfarë po ndodh atje. Nuk e di se çfarë paska bërë ai kaq të rëndë, por e di që ai meriton të ketë gjykimin e duhur. Duhet të lejohet të mbrojë veten dhe duhet të lejohet të bëjë gjithçka që është e nevojshme në lidhje me fushatën.

Ka fjalë që zoti Berisha ka krijuar lidhje me administratën e re të Trump. Bashkëpunëtorë e zotit Berisha e thonë këtë  A e mendoni ju këtë?

Ky është lajm i rremë, Berisha nuk ka mbështetjen e Trumpit. Për Lacivitan më lejoni ta them qartë: jo para, jo Lacivita. Pyetja këtu është ku i gjen Berisha kaq shumë para?

Ai është paguar shumë para, merr shumë para ai për këto gjëra. Më thuaj ti, mos rriten gjë para në pemë në Shqipëri? Veç kësaj ai ka rënë në konflikt me disa njerëz pranë Trump. Pyesni veten pse Trump nuk e ftoi për të qenë pjesë e administratës z.Lacivita? E sfidoj që të shkojë në Shqipëri dhe të thotë se Donald Trump mbështet Berishën dhe se Donald Trump do të heqë sanksionin ndaj tij. Ai nuk mund ta thotë këtë, sepse nuk e ka atë fuqi. Ky është mendimi im për lajmet e rreme që Trump mbështet Berishën. Është e pakuptimtë që ka ende njerëz që besojnë se ai do bëjë diçka të mirë. Por për një gjë duhet t’ia jap meritën: Nuk lodhet së gënjyeri. Ashtu siç gënjeu kur u kthye në pushtet në 2005.

Ka hapësirë që të hiqet non grata apo është e pamundur?

Çdo gjë është e mundur por nuk besoj se do të ndodhë. As në administratën e Donald Trump. Berisha i meriton ato sanksione dhe kjo nuk vihet dot në diskutim. Lacivita foli edhe në media pak ditë më parë dhe nuk e përmendi fare Shqipërinë. As Donald Trump nuk ka folur ndonjëherë për heqje sanksionesh. As i bie në mëndje për Berishën. Pastaj, Berisha ka sanksione edhe nga Britania e Madhe. Ai i meriton ato 100%. Ai duhet të arrestohet dhe ndëshkohet. Kjo është ajo që duhet të ndodhë.

A besoni se ndoshta ka individë që mund ti kenë dhënë informacione të gabuara edhe vetë zotit Lacivita për situatën në Shqipëri? Ata që kanë bërë edhe kontaktin me të?

Fatmir Mediu është i përfshirë në punësimin e Lacvita. Mediu shkon në Uashington me rroba të bukura, flet shumë mirë anglisht duke u përpjekur të krijojë kontakte dhe tenton t’u thotë atyre se po lufton komunizmin në Shqipëri. Ai bën sikur harron se komunizmi nuk ekziston më në Shqipëri, ka kohë që ka avulluar dhe i vetmi komunist i mbetur në Shqipëri tani është Saliu.

Konservatorët në Shtetet e Bashkuara ndoshta disa gjëra nuk i dinë këtë. Mendoni se Fatmir Mediu i thotë Lacivita-s se qeveria e Berishës i ka shitur Pentagonit municion të paligjshëm? A mendoni se i ka thënë LaCivitës për këtë? Mendoni se ka treguar për ndalimin e tij në Itali me atë Mahmutin?

Nuk mendoj se u flet atyre që takon për korrupsionin në kohën e Berishës. Mediu përdor edhe sentimentin që kanë konservatorët për Soros. Sigurisht i gënjen duke u thënë vetëm të vërtetat e tij. Por mbi të gjitha, ka shumë, po shumë pará në këtë mesele.

Berisha ka deklaruar se nëse vjen në pushtet do të votojë një ligj antiSoros. A ju duket normale kjo?

Berisha thotë shumë gjëra, dhe një prej tyre ka qenë se do të luftonte korrupsionin. U bë një nga më të korruptuarit në histori. Po bëj një pyetje për Lacivitan. Le të përgjigjet për këtë, ose le ta bëjë Berisha:

Jared Kushner ishte ortak biznesi me Xhorxh Soros në një kompani të quajtur Kodrne. Jared dhe Ivanka Trump kanë raporte sociale me Alex Sorosin. Dua të sfidoj Lacivitan që të vijë në Shqipëri dhe të thotë se Kushner dhe Ivanka janë kukulla në dorën e Soros.

Vetë presidenti Trump zgjodhi një nga njerëzit e Soros si sekretar thesari. Madje një biznes të tijin e ka filluar me 2 miliard dollarë të dhëna nga Soros. Madje ende ka raport me Soros. Le të vijë Lacivita e të thotë se sekretari amerikan i thesarit është një kukull në duart e Soros.

Kjo teza Soroa është një lojë që ai e ka bërë në disa shtete kur kandidonte John Kerry. Mendon se do ta bëjë edhe këtu që të ndryshojë votën e socialistëve. Por shkurt, siç e thashë, pa para nuk ka Lacivita.

Dua një mendim tuajin për sistemin e drejtësisë në Shqipëri, si ju duket ecuria e tij deri më tani? Dhe a besoni se do ketë përsëri mbështetjen e administratës së re amerikane?

Po i referohesh SPAK?

Po…

Kjo është një pyetje e rëndësishme. Normalisht që duhet të mbështetet. Por unë kam shumë pikëpyetje. Ata arrestojnë Erjon Veliajn 3 muaj para zgjedhjeve dhe lirojnë Sali Berishën. Unë ju kam dhënë shumë informacione atyre për njerëz të korruptuar të Berishës dhe asgjë s’ka ndodhur. U kam kaluar informacione dhe nuk e kam parë SPAK të hetojë asnjë nga këto çështje.

A ka njerëz që kuptojnë se çfarë po ndodh atje? Nuk kam parë SPAK të thërrasë njerëz të përfshirë në  bisedat private në marrëveshjen e AEY-së për municionet. Ka persona të përfshirë në mbi 1 miliard dollarë mashtrim. Unë nuk po e shoh SPAK-un të lëvizë as gishtin për këto. Mendoj se nuk janë në rregull këtu.

Nuk i shoh të hetojnë paratë në një pjesë të korrupsionit që i rrethon. Kështu që duhet të mbështetet, por mendoj se duhet të mbështeten në një mënyrë që të shndërrohet në një krah të vërtetë hetimor, të paanshëm. Nuk po hetohen fajtorët për disa nga krimet më të rënda në Shqipëri.

Çfarë mendoni për Partinë Demokratike? E kemi diskutuar një vit e gjysmë më parë dhe ju ishit shumë skeptik se Berisha do të kthehej sërish. Por ai është sot në krye të PD

Kjo është një pyetje shumë interesante. Shoh që të gjitha partitë po ndjekin në mënyrë agresive diasporën. Këta shqiptarë nga Evropa ose Shtetet e Bashkuara nuk besoj se janë të verbër. Nuk besoj se kujtesa e tyre është kaq afatshkurtër. Ata nuk duhet ta kenë harruar 1997-ën. Ata nuk duhet të kenë harruar shkatërrimin dhe vdekjet në Shqipëri. Unë mendoj se Berisha do të humbasë dhe mendoj se kjo është mënyra e vetme që Partia Demokratike të bëjë ndonjë përparim. Ata drejtohen nga një humbës. Është një humbës i korruptuar. Pas zgjedhjeve ata duhrt ta heqin qafe atë dhe më pas duhet të rishikohet një parti e re me një lidership të ri. Nuk mendoj se socialistët duhet të jenë përgjithmonë në qeveri, por me Berishën është mbyllur kapitulli.

Zoti Kokalari, tani që zoti Trump është kthyer në Shtëpinë e Bardhë, cilat duhet të jenë marrëdhëniet e Shqipërisë me administratën e tij? Mendoni se  zoti Trump dhe administrata e tij do të kenë qasje të re për shqiptarët?

Fatkeqësisht nuk mund të jem 100 përqind i saktë në përgjigjen time. Administrata amerikane shpresojmë se do të jetë ende mbështetëse dhe mike. Jam pak i shqetësuar për Donald Trump. Më pëlqejnë disa nga politikat e tij veçanërisht në lidhje me përpjekjen për të ulur taksat dhe sigurisht jam dakord që burrat nuk duhet të lejohen të luajnë sporte për femra, por jam i trazuar për filozofinë e tij izolacioniste. Nuk jam i sigurt se si do të shfaqet kjo në Ballkan.

Unë nuk e di se si administrata e re do t’i ketë marrëdhëniet me Shqipërinë. Nuk jam i sigurtë. Por ju mund të shikoni se çfarë po bën ai në Ukrainë. U thotë ju duhet tia jepni një pjesë të vendit Putinit, kurse neve të na jepni mineralet. Ai dëshiron të sigurohet që të mos ketë konflikt, por nuk i intereson kush duhet të heqë dorë. Mendoj që për momentin ka probleme të tjera, para se të mendojë për Shqipërinë.

Kam edhe një pyetje tjetër për non gratën e zotit Berisha. A mund të na e sqaroni si funksionon sistemi i shpalljes non grata në SHBA?

Nuk jam një ekspert i fushës por mund t’ju them se nuk funksionon që dikush merr në telefon sekretarin e shtetit, psh Soros e merr në telefon dhe i thotë: Ma shpall non grata këtë personin. Dhe ai i thotë, ok e bëj unë.

Ka një dosje të Berishës për korrupsion. Megjithëse, sinqerisht unë nuk e besoj se duhet një dosje në Departamentin e Shtetit për të kuptuar shqiptarët kush është Berisha. Të gjithë e dinë këtë.

Kthehemi tek privatizimi me biznesmenin Rezart Taci, te kthehemi te marrëveshja e tokës me dhëndrin. Mund të rikthehemi në kaq shumë çështje të kaluara. Ai është i korruptuar, dosja e tij është voluminoze.

Berisha është kaq mashtrues. Mbaj mend çfarë më tha në zgjedhjet e 2005. Më dha një dosje të gjithë këtyre njerëzve që kishin lidhje me drogën dhe lloj-lloj aktivitetesh të tjera korruptive etj. Dhe më tha se këta njerëz do hetohen dhe dënohen të gjithë nëse zgjidhem. Çfarë ndodhi më pas? U bënë miq të tij. Berisha akuzon njerëzit për korrupsion dhe vetë është njeriu që ngriti në Shqipëri administratën më të korruptuar në histori. E veç kësaj është krijuesi i lajmeve të rreme në Shqipëri.

Nëse do të ishit këshilltar i qeverisë shqiptare, çfarë do të sugjeronit në lidhje me kursin apo raportin ndaj administratës së re në SHBA?

Gjatë administrimit të Bidenit, SHBA-të mbajtën marrëdhënie të mira me Ballkanin. Nuk e di çfarë do të bëjnë Shtetet e Bashkuara në lidhje me sigurinë e Ballkanit pasi thashë që jam pak i shqetësuar për këtë politikë izolimi. Por Shqipëria i ka dhënë shumë Shteteve të Bashkuara në lidhje me sigurinë rajonale, në lidhje me luftën ndaj terrorizmit. Shtetet e Bashkuara i detyrohen Shqipërisë.

Faleminderit z. Kokalari ishte me të vërtetë kënaqësi që ju patëm sërish në Report TV