“Kathimerini”, një nga gazetat më të mëdha dhe më me ndikim në Greqi, i ka kushtuar një artikull gjyqit që po zhvillohet në Selanik ndaj biznesmenit shqiptar Ilir Shtufi. Ky i fundit është arrestuar atje më shumë se një muaj më parë me urdhër të SPAK dhe kundërshton ekstradimin.
Sipas artikullit, biznesmeni shqiptar 53 vjeçar, i cili edhe përse nuk përmendet me emër, është Ilir Shtufi, pretendon se është në shënjestrën e kryeministrit Edi Rama, ndaj nuk do të ekstradohet në Shqipëri.
“Një biznesmen 53-vjeçar shqiptar i ndërtimit dhe energjisë, i cili u arrestua në Selanik më 12 qershor sipas një urdhër-arresti ndërkombëtar, mohon akuzat e prokurorëve shqiptarë se ai ka pastruar fitimet nga trafikimi i drogës, duke e quajtur rastin një sulm të motivuar politikisht nga kryeministri Edi Rama.
Prokuroria Speciale Kundër Korrupsionit dhe Krimit të Organizuar e Shqipërisë thotë se ai i përkiste një rrjeti që pastronte miliona euro, dollarë dhe peso midis viteve 2018 dhe 2023 përmes firmave të tregtimit të mishit, frutave dhe qymyrit dhe një kompanie ndërtimi që ndërtonte hotele dhe zyra në Tiranë”, thotë artikulli.
Biznesmeni i kompanisë “Nova Construction”, i njohur për lidhjen e ngushtë me Shkëlzen Berishën, akuzohet për veprën penale “Pastrim i produkteve të veprës penale” kryer në formën e bashkëpunimit të veçantë atë të grupit të strukturuar kriminal dhe SPAK ka vendosur ndaj tij masën e sigurisë “Arrest në burg” në mungesë.
Biznesmeni ka marrë dy avokatë të njohur në vendin fqinj, përmes të cilëve kërkon rrëzimin e kërkesës së ekstradimit, duke refuzuar përballjen me drejtësinë shqiptare.
Cila eshte “lidhja e ngushte me Shkelzen Berishen”?!