Gjykata e Lartë ka rrëzuar rekursin e ish-gjyqtares së Elbasanit, Pajtime Fetahu, kundër vendimit të Apelit të Posaçëm Antikorrupsion, i cili e kishte lënë në masën e sigurisë “arrest në shtëpi”. Trupa e gjykimit, e drejtuar nga Ilir Panda, Sokol Binaj dhe Sandër Simoni, ka mbajtur në fuqi vendimin e mëparshëm.
Fetahu ndodhet nën hetim në kuadër të dosjes “Plumbi i Artë 2”, ku akuzohet për korrupsion dhe bashkëpunim me figura të dyshuara të botës kriminale. Gjithashtu, ajo mbahet në masën e “arrest në burg” për një tjetër dosje, atë të Suel Çelës.
Vendimi i Gjykatës së Lartë pason refuzimin e kërkesës për ndryshimin e masës, e cila ishte paraqitur nga avokatët e Fetahut. SPAK ka dyshime se ish-gjyqtarja ka pranuar ryshfet nga vëllezërit Franc dhe Hajdar Çopja, të dyshuar për lidhje me një grup kriminal të përfshirë në ngjarje të rënda, përfshirë masakrën e Bradasheshit në vitin 2018 dhe trafikun e drogës.
Fetahu u arrestua në fund të muajit nëntor gjatë një operacioni të koordinuar nga SPAK, që synonte goditjen e një grupi kriminal të drejtuar nga Suel Çela. Hetimet tregojnë se ajo kishte komunikuar me anëtarë të organizatës përmes sistemit të enkriptuar SKY ECC dhe dyshohet se kishte favorizuar interesat e tyre me vendime të gjykatës.
i.b./dita
