Katërmbëdhjetë aktivistë pro-demokracisë në Hong-Kong u shpallën fajtorë me akuzën e kërcënimit të përmbysjes së rendit dhe ligjit në vend.
Dy persona të tjerë u liruan. Arrestimi i aktivistëve përbën kështu një kërcënim real për sistemin demokratik në vend. Vendimet në gjyqin më të madh të Hong-Kongut kundër opozitës demokratike vijnë më shumë se tre vjet pasi policia arrestoi 47 opozitarë në bastisjet në të gjithë qytetin. Ata u akuzuan për komplot për të kryer përmbysje, e cila bie ndesh me ligjin e sigurisë kombëtare të vendosur nga Kina.
Dënimi do të vijë në një datë të mëvonshme për ata që janë shpallur fajtorë, me burgim që variojnë nga tre vjet deri në burgim të përjetshëm. Tridhjetë e një të pandehur e pranuan fajin dhe katër prej tyre janë bërë dëshmitarë të prokurorisë. Shtetet e Bashkuara dhe disa vende të tjera e kanë kritikuar gjyqin si të motivuar politikisht, duke kërkuar që të akuzuarit të lirohen menjëherë. Në seancë morën pjesë diplomatë nga disa vende, përfshirë SHBA-në dhe Bashkimin Europian.
Është e paqartë nëse ndonjëri prej personave që u shpall fajtor, do të apelojë vendimin. Në vitin 2019, në Hong-Kong shpërthyen protesta masive pro demokracisë kundër planeve të Pekinit për legjislacionin e sigurisë, që sipas demokratëve do të shkelte liritë e garantuara kur Hong-Kongu u kthye në kontrollin e Kinës në vitin 1997.
Pekini në vitin 2020 vendosi një ligj kombëtar të sigurisë që çoi në arrestimin e demokratëve, por edhe u mbyllën media liberale dhe organizata joqeveritare. Opozita demokratike në Hong-Kong për dekada të tëra i ka bërë presion Pekinit që të lejojë demokraci të plotë në qytet.
j.l./ dita
