Sot nisi gjyqi ndaj ish-ministrit të Mbrojtjes Fatmir Mediu, i cili është zyrtarisht i pandehur për dosjen e Gërdecit.
Në Gjykatën e Posaçme, u mbajt seanca e parë gjyqësore ndaj Mediut, por u shty për në datën 9 maj.
Shkak është bërë mungesa e dy prokurorëve, Altin Dumani dhe Arben Kraja.
Të pranishëm në seancë ishin edhe anëtarë nga familja Durda, e cila humbi djalin e saj 7-vjeçar në shpërthimin famëkeq të Gërdecit. Por, GJKKO nuk i ka pranuar si palë në gjykim.
Mbrojtja e Mediut është shprehur se vepra penale, për të cilën akuzohet, shpërdorimi i detyrës, është parashkruar sipas nenit 66 të Kodit Penal, pasi kanë kaluar më shumë se sa 10 vjet nga koha e kryerjes së veprës penale deri në çastin e marrjes së personit si të pandehur.
GJKKO ka pranuar gjykimin e shkurtuar. Mediu akuzohet për shpërdorim detyre të dyfishtë sipas Kodit Penal dhe Kodit Penal Ushtarak.
Më herët janë marrë të pandehur 28 persona për dosjen në fjalë, mes tyre edhe Mihal Delijorgjin, president i shoqërisë “Albademil”, Ylli Pinari, drejtor i kompanisë MEICO dhe Dritan Minxholli, administrator.
Të tre janë liruar pasi në shkurt 2013, Gjykata e Apelit reduktoi me 1/3 dënimin e dhënë nga Gjykata e Tiranës.
j.l./ dita
