Zamira Durda, humbi djalin e saj 7 vjeçar në masakrën e Gërdecit të 15 marsit 2008. Ndërkohë që shumë familjarë viktimash u lodhën, u vetëvranë ose e shitën gjakun e të vrarëve, Zamira nuk u dorëzua kurrë dhe vazhdon betejën e saj ligjore me të gjitha format.
Në gjyqin për ish ministrin e Mbrojtjes Fatmir Mediu që u rihap falë këmbënguljes së saj në Gjykatën e Posaçme emri i Zamirës dhe i bashkëshortit ndodhen në listën e 71 dëshmitarëve të cilët SPAK kërkon që të thirren nga gjykata për tu dëgjuar.
Për herë të parë SPAK i kërkon gjykatës të marrë në pyetje edhe Shkëlzen Berishën si dëshmitar në këtë gjyq.
Në një intervistë për mediat, gruaja e hekurt e Gërdecit thotë se fajtor për atë që ndodhi në 15 marsin e 2008 është e gjithë piramida shtetërore e asaj kohe, nga Presidenti i asaj kohe Bamir Topi, kryeministri, – i cili atëherë ka qenë Sali Berisha -, ministri i Mbrotjes, – i cili atëherë ka qenë Fatmir Mediu – deri tek kryeplaku i fshatit.
“Gërdeci është një krim shtetëror. Në Gërdec ndodhi ajo që ndodhi nga babëzia për para. E gjithë piramida shtetërore e asaj kohe dështoi. Që nga presidenti dhe tek kryeplaku i fshatit që nuk reagoi. Të gjithë kanë qenë në dijeni dhe askush nuk veproi. Të gjithë janë fajtorë. Ne ishim viktimat” e nis intervistën Zamira.
SPAK akuzon Fatmir Mediun për “Shpërdorim të detyrës” me pasojë vrasjen e të paktën 26 personave, ndërsa u plagosën dhe u gjymtuan përjetë qindra të tjerë.
Vijimi i një procesi të zakonshëm, duke hequr dorë nga gjykimi i shkurtuar ka dhënë një dritë jeshile për familjet e viktimave që humbën jetën në fabrikën e demontimit.
“Gjykimi i zakonshëm është dritë jeshile për ne. Të hidhen të gjitha letrat në tavolinë. Do të ndjek të gjitha hapat. Që nga momenti kur ka dalë VKM-ja 137, urdhri i ministrit dhe të gjitha do i kaloj hap pas hapi. Është hera e parë që viktima është palë në proces. Kam kërkuar ndryshimin e akuzës për Fatmir Mediun.
Vërtet ai thotë që unë vetëm shkresat kam firmosur, por shkresat e tij nxorrën armatimet nga depot që ishin. I gjithë transporti i armatimit është bërë me mjetet e ushtrisë. Unë di që aty funksiononte ministria e Mbrojtjes që kishte detyrë të na mbronte. Ditë për ditë rrugët ishin të bllokuara me kamionët e ushtrisë. Vendi që u përzgjodh ishte i gabuar. Emri që ka marrë aksident teknologjik ishte i gabuar, se vetëm teknologji nuk kishte aty. Ka shumë emra të tjerë që janë përfshirë. Do kërkoj në seancën e radhës të dëshmojnë.” thotë Durda.
Megjithatë ka rezervat e saj. Pasi me këtë gjyq nuk mund të dënohen biznesmeni Mihal Delijorgji, atëherë president i shoqërisë “Albademil”, Ylli Pinari, atëherë drejtor i kompanisë MEICO dhe Dritan Minxholli, atëherë administrator i fabrikës, të cilët janë liruar nga burgu pas kryerjes së dënimeve përkatëse.
“Do të jetë drejtësi e cënguar pasi me Kodin e Ri Penal për 29 të pandehurit e tjerë nuk mund tua rëndosh pozitat e tyre pasi qenkan dënuar një herë. Unë nuk di as kam qenë pjesë e procedurave ne jemi thjesht viktima të kësaj. Është bërl gjyq pa viktimat. Për Mihal Dëelijorgji, Ylli Pinari, Dritan Minxhozi u pranua gjykimi i shkurtuar për këta. Nuk mund të ridënohen” nënvizon Durda.
“Kemi një Ylli Pinari të dalë nga burgu se nuk kishte kush të kujdesej për nënën e tij. Dritan Minxholli që doli nga burgu se i ofruan punë. E kush i ofroi punë? Mihal Delijorgji“ – thotë Zamira…
