Një grevë e përgjithshme në Izrael ndërpreu punën në banka, transportin publik, spitale, dyqane dhe aeroportin kryesor të vendit, pasi sindikata më e madhe izraelite është vënë në përpjekje për të ushtruar trysni mbi qeverinë për të arritur një marrëveshje armëpushimi me Hamasin, një ditë pasi gjashtë pengje të tjerë u gjetën të vdekur në Gaza.
Arnon Bar-David, kryetar i sindikatës Histadrut, tha të dielën se arritja e një marrëveshjeje për lirimin e pengjeve që mbahen nga Hamasi në Gaza “është çështja më e rëndësishme”.
“Deri më tani kemi treguar shumë përgjegjësi dhe nuk ka qenë e lehtë”, tha zoti Bar-David. “Por mendoj se ne nuk mund të rrimë duarkryq. Ne nuk mund të injorojmë klithmat e fëmijëve tanë që po vriten në tunelet në Gaza; është e papërfytyrueshme…”
Me sa duket, pengjet u qëlluan për vdekje nga militantët në kohën kur trupat izraelite po i afroheshin vendndodhjes së tyre në Gaza. Ministria e Jashtme e Izraelit tha herët të hënën se një ekzaminim mjeko-ligjor tregoi se pengjet u vranë nga të shtënat me armë zjarri nga afërsia, 48-72 orë para ekzaminimit.
Greva e së hënës pasoi protestat e së dielës mbrëma, në të cilat dhjetëra mijëra njerëz kërkuan që kryeministri izraelit Benjamin Netanyahu të binte dakord për një armëpushim.
Mijëra njerëz u mblodhën jashtë zyrës së kryeministrit Netanyahu në Jerusalem. Në Tel Aviv, të afërmit e pengjeve parakaluan me arkivole për të simbolizuar numrin e të vdekurve.
Protesta u duk se ishte më e madhja në gati 11 muaj lufte.
Të afërm dhe mbështetës të pengjeve izraelite që mbahen në Gazë gjatë protestës në Jeruzalem, 1 shtator 2024.
Më herët të dielën, kryeministri Netanyahu u zotua të intensifikojë luftën me Hamasin pasi ushtria izraelite gjeti trupat e pengjeve të vdekur.
“Ata që vrasin pengjet nuk duan një marrëveshje” për një armëpushim në Gaza, tha kryeministri Netanyahu në një deklaratë, duke u thënë udhëheqësve të Hamasit, “ne do t’ju gjuajmë, do t’ju kapim dhe do t’i lajmë hesapet”.
Ai akuzoi gjithashtu Hamasin për kryerjen e një sulmi me armë zjarri më herët të dielën që vrau tre oficerë policie pranë qytetit të Hebronit në Bregun Perëndimor të pushtuar nga Izraeli. Hamasi e quajti atë një “operacion heroik të rezistencës”, përgjegjësinë për të cilin e morën brigadat Al AQassam.
Izraeli thotë se beson që 101 pengje izraelite dhe të huaj mbeten në Gaza, por rreth një e treta e tyre besohet të kenë të vdekur, ndërsa fati i të tjerëve nuk dihet.
Zyrtarë të lartë të Hamasit thanë se Izraeli, me refuzimin e tij për të nënshkruar një marrëveshje armëpushimi, është përgjegjës për vdekjet më të reja.
Forumi i Familjeve të Pengjeve i bëri thirrje kryeministrit Netanyahu të marrë përgjegjësinë dhe të shpjegojë se çfarë po e pengonte një marrëveshje.
i.b./dita
