Një i ri britanik, është gjetur pas 6 vitesh në Francë. Sipas SkyNews, Alex Batty, nga Oldham kur ishte vetëm 11-vjeç kishte shkuar për pushime në Spanjë së bashku me nënën dhe gjyshin e tij, por u zhduk pa lënë asnjë gjurmë. Por kur për familjen e tij shpresat kishin humbur, Alex Batty u gjet të mërkurën në mëngjes në qytetin Revel.
Një student tha për mediat franceze se kishte parë një adoleshent , i cili më vonë rezultoi se ishte Alex, duke ecur natën në shi dhe i kishte ofruar ta merrte me makinë. Pasi foli për një moment, Aleksi i tregoi atij historinë e tij dhe tha se kishte ecur në male për më shumë se katër ditë në një përpjekje për t’u kthyer në Angli.
Duke folur për Le Depeche, ai tha: “Minutat e para, ai dukej pak i turpshëm. Ne u përpoqëm të flisnim në frëngjisht, por vura re se ai nuk e fliste gjuhën.
Vendosa të komunikoja në anglisht. Kur e pyeta se si quhej, ai tha se quhej Zac dhe më pas vazhduam të bisedonim. Ne folëm për më shumë se tre orë. Ai më dha identitetin e tij të vërtetë, Alex Batty, përpara se të më shpjegonte historinë e tij”.
Ai tha se Alex i kishte thënë se ishte rrëmbyer nga nëna e tij dhe kishte jetuar në një shtëpi luksoze në Spanjë me rreth 10 persona si pjesë e një “komuniteti shpirtëror”, duke mbërritur në Francë rreth vitit 2021.
Alex shkoi jashtë vendit me nënën e tij Melanie Batty, 38 vjeç dhe gjyshin e tij David Batty, 59 vjeç, në një udhëtim në vitin 2017. Pavarësisht apeleve publike ndërkombëtare, kujdestari ligjor i Alex, gjyshja e tij Susan Caruana, nuk e kishte parë atë që kur u largua nga Britania.
Policia e Mançesterit tha se ishte në kontakt me autoritetet franceze. Një zëdhënës i autoriteteve tha: “Ky është një hetim kompleks dhe afatgjatë dhe ne duhet të bëjmë hulumtime të mëtejshme, si dhe të vendosim masat e duhura mbrojtëse”.
p.c. / dita
