Prokuroria e Durrësit ka pezulluar nga detyra 9 punonjës të ish-Aluiznit në Durrës, pasi akuzohen për shpërdorim detyre.
Bëhet me dije se punonjësit në fjalë kanë legalizuar një sipërfaqe toke, e cila në fakt ishte pronë shtetërore.
“Nga hetimet rezultoi se në vitin 2013, punonjës të ish-Aluizni-t Durrës kanë legalizuar disa pasuri të ndodhura në komunën Xhafzotaj, pjesë të të cilave ndodhen të ndërtuara mbi pasurinë e cila ka një sipërfaqe 2184 m2 dhe kategorizohet në zërin kadastral “Rrugë” me status juridik “shtet”, thuhet në njoftimin e Prokurorisë së Durrësit.
Gjithashtu, janë pezulluar dhe punonjësit të cilët nuk kanë kallëzuar ndërtimet e paligjshme të konstatuara.
“Punonjës të IMT-së Shijak, me mosveprimet e tyre kanë konsumuar elementë të veprës penale të “Shpërdorimi i detyrës kryer në bashkëpunim” parashikuar nga neni 248 e 25 të K.Penal, pasi ata kanë marrë vendime prishjeje të cilat nuk janë ekzekutuar si dhe nuk kanë depozituar kallëzime penale në lidhje me ndërtimet e paligjshme që kanë konstatuar”, vijon njoftimi.
“Shtetasi A.K. me detyrën e Drejtorit të bordit të ndërmarrjes kanalizmieve, ka konsumuar elementet e veprës penale te “Shpërdorimit të detyrës” pasi me shkresen nr.158/1 prot datë 26.03.2015, i ka kthyer përgjigje Drejtorisë së Aluizit Durrës, ku informonte se objekti i shtetasit F. H., nuk cënon objektet, sistemin kullues që Bordi i Kullimit Durrës –Krujë ka në inventar”, bëhet me dije në njoftim.
Shtetasit M. I., M. K., H.H., A.M., D.Z., M. Sh., J.K., G.K. dhe M.T., do të akuzohen për veprat penale “Shpërdorimi i detyrës kryer në bashkëpunim” dhe “Moskallëzim i krimit”.
p.k\dita
