Një 33-vjeçar shqiptar është vënë në pranga nga autoritetet kolumbiane.
Arrestimi i shqiptarit ka ardhur pasi ishte i shpallur në kërkim ndërkombëtar nga GJKKO si pjesëtar i një organizate kriminale për trafikimin e armëve.
Policia bën me dije se 33-vjeçari u vendos në pranga në qytetin e Kartagjenës. Roli i të arrestuarit ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi.
Njoftimi i plotë:
Policia e Shtetit/ Finalizohet një tjetër operacion i përbashkët me partnerët, për kapjen e shtetasve në kërkim ndërkombëtar. Operacioni i koduar “Kartagjena”, rezultat i shkëmbimit të informacioneve ndërmjet strukturave të Policisë së Shtetit dhe atyre të Kolumbisë, për vendndodhjen e një të kërkuari nga drejtësia shqiptare.
Kapet nga Policia kolumbiane, në qytetin e Kartagjenës, 33-vjeçari nga Tropoja, i shpallur në kërkim ndërkombëtar, i akuzuar nga GJKKO, si pjesëtar i një organizatë kriminale për trafikim të armëve. Në vijim të bashkëpunimit me homologët, për lokalizimin dhe kapjen e shtetasve të shpallur në kërkim ndërkombëtar, bazuar dhe në informacionet e shkëmbyera mes strukturave të Policisë së Shtetit dhe atyre të Kolumbisë, nëpërmjet Interpol Tiranës, në kuadër të operacionit policor “Kartagjena”, është lokalizuar, kapur dhe ndaluar në qytetin e Kartagjenës, nga Policia kolumbiane, shtetasi A. Gj., 33 vjeç, lindur në Tropojë.
Ky shtetas ishte shpallur në kërkim ndërkombëtar, pasi Gjykata e Posaçme Kundër Korrupsionit dhe Krimit të Organizuar, e akuzon si pjesëtar të një organizate kriminale për trafikimin e armëve. Roli i tij kryesor ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi. Interpol Tirana, në bashkëpunim me autoritetet kolumbiane, do të kryejë procedurat për ekstradimin e shtetasit A. Gj., në Shqipëri.
Kush është Almir Gjidiaj?
Almir Gjidiaj me origjinë nga Tropoja, qëndronte në një hotel në ishujt Rosario në qytetin e Kartagjenës në momentin që është vënë në pranga.
Në momentin që 33-vjeçari ka parë efektivët e policisë kolumbiane ka tentuar që të arratiset nga hoteli që qëndronte. Por tentativa e tij ishte pafat, pasi ndërhyrja e efektivëve të policisë ka bërë që ai të arrestohet në oborrin e hotelit.
Sipas burimeve bëhet me dije se roli i të arrestuarit ishte të drejtonte logjistikën dhe transportin për shitjen e armëve të zjarrit me rreze të mesme dhe të gjatë në tregun e zi. Më pas këto armë përdoreshin nga grupet shqiptare të lidhura drejtpërdrejtë me Kartelin Ballkanik.
Ndërkohë që Gjidiaj nuk është emër i panjohur për autoritetet policore në vend. Në vitin 2011, në banesën që qëndronte në Tiranë, ai ishte pre e një atentati me tritol. Ndërkohë që pas kontrollit të policisë në banesën që qëndronte me 3 persona të tjerë janë gjetur dhe 5 kg kanabis.
Almir Gjidiaj rezulton në të njëjtin grup me te arrestuarin tjetër në gusht të vitit të shkuar, Admir Tutaj, i cili u ekstradua drejt vendit tonë.
j.l./ dita
