Lotito i Lazios e zgjodhi atë si drejtor sportiv sapo ai ndaloi së luajturi në 2008. Shumicës iu duk një zgjedhje e rrezikshme, por në vend të kësaj ai parashikoi tregun global.
Tanimë shqiptari është një hap larg për të kaluar te Milani dhe “Gazzetta dello Sport” tregon recetën e Igli Tares për të konkurruar në nivele të larta me buxhete të reduktuara.
Kur ai u zgjodh çuditërisht si drejtor sportiv, shumë ishin dyshues. Igli Tare sapo kishte shpallur tërheqjen nga futbolli, ishte vera e vitit 2008 dhe Lazio po i thoshte lamtumirë Ualter Sabatinit, i cili kishte mbajtur këtë post në vitet e mëparshme.
Claudio Lotito, i panjohur për kthesa të tilla, i habiti të gjithë dhe zgjodhi ish-sulmuesin e Kombëtares shqiptare. Ai nuk e kishte ende licencën e drejtorit sportiv (do ta merrte në muajt në vijim) dhe kishte luajtur për Lazion në tre vitet e mëparshme, të fundit të karrierës në fushë.
“La Repubblica” bën me dije se Tare flet gjashtë gjuhë të huaja. Ndërkohë “La Gazzetta dello Sport” i ka bërë edhe një profil të detajuar 51-vjeçarit.
Sipas të përditshmes rozë, Tare ka bindur drejtuesit për atë çfarë ka treguar në Romë. Sipas gazetës sportive më të madhe në Itali, profili i Tares konsiderohet si ideal për momentin që po kalon “Djalli”. Shqiptari gjatë punës së tij me Lotiton ka treguar se di se si të menaxhojë marrëdhënie me “eprorë” kërkues duke mbajtur ekipin kompetitiv me pak shpenzime.
Ndërsa sipas “Corriere della Sera”, Igli Tare ka mundur të fitojë këtë vend të rëndësishëm pune edhe falë ndërhyrjes së super-menaxherit të Cristiano Ronaldos, Jorge Mendez.
Kujtojmë se ky i fundit është në marrëdhënie mjaft të mira më drejtuesit e Milanit pasi në dimër u dërgoi në formë huazimi një lojtar si Joao Felix. Nëse Tare do të zyrtarizohej atëherë Mendez do të “blindonte” qëndrimin në Milano edhe të një tjetër figure të dashur. Geoffrey Moncada do të rinovonte kontratën, e cila i skadon në fund të sezonit dhe do të merrej me sektorin e zbuluesve të talenteve.
d.t/dita
