Në emisionin “N’xhiro me Syçin”, Ilir Demalia dhe Eduard Prodani kanë zhvilluar një debat të thelluar mbi mungesën e elitave të vërteta në Shqipëri, duke trajtuar ndikimin e trashëgimisë komuniste dhe degradimin e figurës së intelektualit në shoqëri.
“Na ka kap një paradoks. Disa që hiqen si super antikomunistë, në të vërtetë mendojnë e gjykojnë si komunistë,” u shpreh Eduard Prodani, duke denoncuar hipokrizinë e disa figurave publike që, sipas tij, janë më shumë reminishenca të së kaluarës sesa udhëheqës të mendimit të lirë. Ilir Demalia ishte edhe më i drejtpërdrejtë: “Elitat shqiptare i kanë shërbyer gjithmonë bythës së vet. Jo shoqërisë. Dhe vazhdojnë ta bëjnë këtë pa turp,” tha ai.
Sipas Demaliajt, përgjegjësia për krizën kulturore dhe morale nuk i takon popullit, por elitave të papërgjegjshme që nuk kanë ditur të udhëheqin, të edukojnë dhe të frymëzojnë. Duke krahasuar figurat e shquara të së kaluarës si Gurakuqi dhe Fishta me përfaqësuesit aktualë në Parlament, Demalia theksoi: “Nga Shiroka e Fishta kemi rënë në baltën e oportunizmit dhe mediokritetit politik.” Sipas tyre, mungesa e një vizioni të qartë dhe e angazhimit për të mirën publike është problemi themelor i Shqipërisë sot. Elitat nuk janë më zëri i së vërtetës, por vegla të pushtetit dhe përfitimit personal.
