Ftesat e Indisë për liderët e vendeve të G20 kanë ngritur shumë pikëpyetje brenda dhe jashtë vendit. Në to, Droupadi Murmu përmendet si “President i Bharat”, në vend të “Presidenti i Indisë”.
Në të njëjtën ditë, një postim në Twitter i zëdhënësit të Partisë Bharatiya Janata (BJP) në pushtet, i cili njoftonte pjesëmarrjen e kryeministrit Modi në një samit të Shoqatës së Kombeve të Azisë Juglindore (ASEAN) në Indonezi, i referohej atij si “kryeministër i Bharat-it”.
Në kushtetutën e saj, India njihet si Idi dhe Bharat. Edhe emri Hindustan përdoret shpesh brenda kufijve të vendit.
Megjithatë, në mbarë botën, India është emri më i përdorur.
Bharat është një term sanskrit që gjendet në shkrimet e shenjta të 2000 vjetëve më parë. I referohet një territori të paqartë, Bharatavarsa, i cili shtrihej përtej kufijve të sotëm të Indisë dhe mund të ketë përfshirë edhe atë që është Indonezia e sotme.
Përdorimi i këtij emri në ftesat zyrtare drejtuar liderëve të G20 ka ngritur hipotezën se partia e kryeministrit Mod, BJP, mund ta bëjë ndryshimin e emrit një fakt të kryer.
BJP u ka ndryshuar tashmë emrat qyteteve dhe vendeve që lidhen me periudhën Mughal dhe atë koloniale. Vitin e kaluar, për shembull, Kopshti Mughal në pallatin presidencial në Nju Delhi u quajt Amrit Udyan.
Kritikët thanë se emrat e rinj janë një përpjekje për të fshirë nga historia indiane Mughalët, të cilët ishin myslimanë dhe sunduan nënkontinentin për gati 300 vjet.
Roop Rekha Verma, profesor i filozofisë dhe ish-zëvendës kancelari i Universitetit Lucknoë në shtetin verior të Uttar Pradesh, thotë se kjo polemikë i ka rrënjët në intolerancën e treguar nga qeveria e Modit.
“Kemi parë që ka mospërfillje të vazhdueshme të Kushtetutës dhe ligjeve. Nëse Gjykata e Lartë jep një urdhër dhe qeverisë nuk i pëlqen, atëherë ai ndryshon”, citohet Verma nga Al Jazeera.
Opozita e kundërshton idenë e ndryshimit të emrit Indi.
“Ndërsa nuk ka asnjë kundërshtim kushtetues për ta quajtur Indinë ‘Bharat’, që është një nga dy emrat zyrtarë të vendit, shpresoj se qeveria nuk do të jetë aq e trashë sa të heqë dorë plotësisht nga ‘India’, e cila mban vlerën e pallogaritshme të markës së ndërtuar mbi shekuj”, shkroi Shashi Tharoor, deputet i Partisë së Kongresit Kombëtar Indian.
Por zërat nga partia e Modit e mbështesin idenë e shndërrimit të Indisë në Bharat, edhe në rrafshin ndërkombëtar. BJP ka argumentuar shpesh se emri “India” është një mbetje e së kaluarës koloniale të vendit.
“Britanikët e ndryshuan emrin nga Bharat në Indi”, tha Bansal në një seancë parlamentare. “Vendi ynë njihet me emrin ‘Bharat’ prej mijëra vjetësh. … Emri ‘India’ u dha nga kolonialisti Raj dhe prandaj është simbol i skllavërisë.”
p.c/dita
