Një studim i ri tregoi se inteligjenca artificiale (AI) mund të lexojë radiografinë e një personi për të përcaktuar moshën biologjike të tij.
Në studimin e publikuar në “The Lancet Healthy Longevity’, studiuesit zbuluan se sa më e lartë të ishte mosha e vlerësuar nga AI krahasuar me moshën aktuale të një personi, aq më shumë gjasa kishte që individët të kishin një sëmundje kronike.
“Rezultatet tona tregojnë se nëse radiografia tregon se një individ është më i madh se mosha e tij reale, ky është një sinjal që tregon se ai person mund të këtë një sëmundje kronike të pazbuluar”, thotë studiuesi Yasuhito Mitsuyama në një deklaratë.
“Ne synojmë ta zhvillojmë më tej këtë hulumtim që në të ardhmen të mund të parashikojmë jetëgjatësinë e një personi apo dhe të parashikojmë probleme të mundshme”.
Për të krijuar një model të AI që mund të lexojë radiografi, studiuesit përdorën më shumë se 67,000 radiografi të bëra midis 2008 dhe 2011 nga individë të shëndetshëm nëpër institucione të shumta.
Për individët e shëndetshëm, kishte një lidhje të fortë midis moshës së vlerësuar nga AI dhe moshës kronologjike të personit.
Studiuesit gjithashtu testuan më shumë se 34,000 radiografi nga pacientë me sëmundje të njohura.
Ata përcaktuan se modeli i vlerësuar nga AI jepte një moshë më të lartë në krahasim me moshën aktuale të personit për disa sëmundje kronike si hipertensioni, sëmundja kronike pulmonare, sëmundja e mëlçisë, sëmundja e mushkërive dhe problemet me veshkat.
“Ky rezultat do të thotë që AI ynë kap ndryshimet kronike në radiografi”, thanë autorët e studimit.
Autorët thonë se ky model i AI mund të shërbejë si një tregues për sëmundjet e lidhura me moshën dhe të ndihmojë në zbulimin dhe ndërhyrjen e hershme.
o.j/dita