Greqia do të ketë një qeveri kalimtare që do të drejtojë vendin deri në zgjedhjet e parakohshme, që pritet të mbahen më 25 Qershor.
Presidentja Katerina Saqellaropulu ngarkoi këtë të mërkurë kreun e Gjykatës së Auditit Ioannis Sarmas për të formuar një qeveri të përkohshme, që do të miratohet të dielën kur të mblidhet parlamenti i dalë nga zgjedhjet e së dielës.
Parlamenti i ri pritet të shpërndahet një ditë më pas, duke i hapur rrugë dekretimit nga Presidentja të 25 Qershorit për mbajtjen e zgjedhjeve të parakohshme dhe nisjen e fushatës elektorale.
Në dy ditët e para të kësaj jave, liderët e 3 partive më të votuara në zgjedhjet e 21 Majit, refuzuan të negociojnë krijimin e koalicioneve qeverisëse paszgjedhore, pasi asnjëri nuk arriti të marrë mjaftueshëm deputetë për ta formuar vetë qeverinë.
Kodi Zgjedhor parashikon që fituesi i zgjedhjeve të dyta që mbahen pas dështimit të gjenerimit të një shumice qeverisëse nga të parat, merr deri 50 deputetë shtesë, nëse siguron 40% të votave.
Demokracia e Re që në zgjedhjet e 21 Majit e kapërceu këtë nivel mund të marrë mbi 170 deputetë, edhe më shumë se në zgjedhjet e 2019-ës kur mori 158 vende.
m.b/dita
