Një nga të parët që shprehu pakënaqësinë e tij për qëndrimin e Boris Johnson dhe dorëzoi dorëheqjen, ish-ministri i financave Rishi Sunak ka njoftuar zyrtarisht se do të jetë kandidat për kryesinë e partisë Konservatore dhe në vazhdim për kryeministër.
Sipas Guardian, ish-ministri 42-vjeçar konsiderohet si një nga favoritët për të zëvëndësuar Johnson si në parti ashtu dhe në drejtimin e qeverisë. Të martën, ai njoftoi se po largohej nga qeveria, së bashku me Sekretarin e Shëndetësisë Sajid Javid, pas një skandali të ri. Dorëheqjet e tyre shkaktuan një cunami largimesh dhe Johnson u detyrua përfundimisht të jepte dorëheqjen të enjten.
“Dikush duhet të shfrytëzojë këtë moment dhe të marrë vendimet e duhura. Kjo është arsyeja pse unë po kandidoj për të qenë lideri i ardhshëm i Partisë Konservatore dhe kryeministri i ardhshëm”, tha Sunak në një video të postuar në Twitter.
Ai shtoi se vendimet që do merren do të përcaktojnë nëse brezi i ardhshëm i britanikëve ka një shans për një të ardhme më të mirë. Ai u shpreh se ky është momenti për të parë nëse e përballojnë këtë moment me ndershmëri, seriozitet dhe vendosmëri, apo i tregojmë vetes përralla që na bëjnë të ndihemi më mirë për pak kohë, por do t’i lënë fëmijët tanë më keq nesër.
j.l./ dita
