Gjykata e Posaçme e Shkallës së Parë vendosi më 30 korrik deklarimin fajtor të ish-oficerit të sektorit të Operacionales në Policinë e Shtetit, Igli Haxhiaj, i cili u akuzua nga SPAK se u serviri informacione sekrete të hetimit tek anëtarët e një grupi kriminal, që kishte për detyrë që t’i mbante në vëzhgim.
Trupi gjykues i përbërë nga gjyqtarët Atalanta Zeqiraj, Marinela Osmani dhe Besmir Stroka e deklaroi Haxhiajn fajtor për veprat penale “Zbulimi i akteve ose të dhënave sekrete”, “Korrupsioni pasiv…” e “Shpërdorim i detyrës” dhe e dënoi atë me 4 vjet burgim. Në aplikim të gjykimit të shkurtuar, ai do të vuajë një dënim të reduktuar prej 2 vitesh e 8 muajsh heqje lirie. Po ashtu, u caktua dhe dënimi plotësues, për heqjen e të drejtës për të ushtruar funksione publike për një periudhë prej 5 vitesh.
Sipas SPAK, hetimet e përbashkëta me drejtësinë italiane dhe zviceriane kanë zbuluar veprimtarinë e një grupi të strukturuar kriminal, të përbërë kryesisht nga shtetas shqiptarë, që ka pasur si qëllim trafikimin ndërkombëtar të lëndëve narkotike. Anëtarët e këtij grupi operonin në territorin shqiptar dhe italian, duke importuar lëndë narkotike drejtpërdrejtë nga Amerika e Jugut dhe përmes rrugëve tregtare, duke hyrë në portet kryesore të Europës Veriore.
Në vitin 2019, kur ka filluar hetimi ndaj këtij grupi kriminal, i pandehuri Igli Haxhiaj ka qenë në cilësinë e oficerit të policisë gjyqësore në Drejtorinë e Forcës së Posaçme Operacionale, në Drejtorinë e Përgjithshme të Policisë së Shtetit. Ai ka qenë pjesë e grupit të hetimit që ka kryer përgjimin dhe vëzhgimin e fshehtë të të dyshuarve për trafik lëndësh narkotike.
Ndërkohë që ka qenë duke vëzhguar të dyshuarit, Haxhiaj i ka bërë me dije njërit prej tyre se ka qenë objekt hetimesh dhe që po përgjoheshin. Në këmbim të informacioneve të dhëna, ai akuzohet se ka përfituar shumën prej 15 mijë eurosh.
Implikimi i punonjësve të policisë në aktivitete të krimit të organizuar është një problem shqetësues, i cili ka dalë në sipërfaqe gjatë hetimeve të bazuara në komunikimet e aplikacionit SKY ECC. Në më shumë se një rast, ish-kreu i SPAK, Altin Dumani ka ngritur publikisht alarmin e korruptimit të zyrtarëve të policisë nga eksponentë të krimit të organizuar.
