Ministri i Mbrojtjes Civile dhe Politikës Detare siguroi se zbarkimi i emigrantëve në brigjet italiane është rritur me 300%. Qeveria e Italisë shpalli sot një gjendje të jashtëzakonshme migratore në të gjithë vendin për gjashtë muajt e ardhshëm, pas rritjes eksponenciale të fluksit migrator (emigrantëve të paligjshëm). Në tre ditët e fundit në bregdetin italian janë zbarkuar mbi 3000 persona, që paraqet një rritje prej 300%, siç sqaroi ministri i Mbrojtjes Civile dhe Politikës Detare, Nello Musumeci. Masa me propozim të këtij ministri do të ketë një financim fillestar prej pesë milionë eurosh që do të zbatohet në të gjithë territorin kombëtar. “Më lejoni të jem i qartë, problemi nuk mund të zgjidhet, zgjidhja e të cilit lidhet vetëm me një ndërhyrje të ndërgjegjshme dhe të përgjegjshme të Bashkimit Europian”, tha Musumeci, sipas medias italiane “Repubblica”. Të hënën, roja bregdetare italiane kreu një sërë operacionesh për të shpëtuar dy varka që, në total, mbanin 1200 persona, sipas ‘Reuters’. Njëri prej tyre, i cili mbante 400 persona, u largua nga Tobruku (Libi); ndërsa tjetri, prej 800 personash, u shpëtua rreth 200 kilometra larg Sirakuzës (Sicili). Ky shpëtim i fundit ishte i ndërlikuar për shkak të numrit të njerëzve në bord, sipas agjencisë së cituar.
Sipas agjencisë ANSA, gjendja e jashtëzakonshme do të lejojë zbatimin e procedurave dhe veprimeve për të zgjidhur më shpejt pritjen e emigrantëve, “në një kohë të shkurtër me standarde adekuate”. Burime qeveritare i kanë thënë këtij mediumi se si Mbrojtja Civile ashtu edhe Kryqi i Kuq Italian do të jenë pjesë e operacioneve, duke ofruar “eksperiencë dhe pajisje”. Gjithashtu, do të përmirësohen strukturat për “riatdhesimin e atyre që nuk kanë të drejtë të qëndrojnë në Itali (CPR), duke forcuar aktivitetet e identifikimit dhe dëbimit”.
