Iu dhanë madje më shumë! Si i tjetërsuan 1.143 ha tokë në bregdetin e Semanit 

Nga Edmond Hoxhaj

Sipas Prokurorisë së Fierit, dy ish-drejtorët e ASHK-së Fier, Bardhyl Kapaj e Ertis Shehu, si dhe një jurist i këtij institucioni, regjistruan në emër të disa shtetasve 1143 ha tokë në fshatrat Seman i Ri dhe Sheq Marinas, duke pranuar dy vendime të falsifikuara për kthimin e tokave, pa kryer verifikimet që kërkon ligji, madje iu dhanë më shumë tokë nga sa përcaktohej në aktet e falsifikuara.

Prokuroria e Fierit njoftoi të enjten më 17 shtator arrestimin e dy ish-drejtorëve të Agjencisë Shtetërore të Kadastrës Fier, Bardhyl Kapaj e Ertis Shehu, të një specialisti të këtij institucioni, si dhe të një shtetasi tjetër që ka përfituar përmes falsifikimit të dokumenteve 1143 hektarë tokë në zonën e Semanit. Të proceduarit po hetohen për veprat penale “falsifikimi i dokumenteve”, “shpërdorimi i detyrës”, si dhe “pastrimi i produkteve të veprës penale ose i veprimtarisë kriminale”.

Me kërkesë të prokurorisë, janë sekuestruar 76 ngastra toke, me sipërfaqe totale prej 1143 hektarësh tokë, si dhe 150 mijë euro.

Nga hetimi ka rezultuar se përfituesi i tokave, shtetasi K.H., ka paraqitur si tituj pronësie dy vendime të falsifikuara të Komisionit të Kthimit dhe Kompensimit të Pronave Fier, duke arritur të regjistrojë në bashkëpronësi të tij dhe katër personave të tjerë ngastrat e tokave që janë sekuestruar, që gjenden në fshatin Seman i Ri dhe Sheq Marinas, Fier. I hetuari K.H., në cilësinë e bashkëpronarit dhe përfaqësuesit të bashkëpronarëve të tjerë, me anë të një prokure të posaçme të falsifikuar, u ka shitur këtë tokë dy shoqërive të ndryshme.

Sipas prokurorisë, dy ish-drejtorët dhe juristi i proceduar i ASHK-së Fier kanë regjistruar në kundërshtim me ligjin këto prona në bashkëpronësi të shtetasit K.H., duke mos kërkuar konfirmimin e vendimeve të Komisionit të Kthimit dhe Kompensimit të Pronave Fier nga Agjencia e Trajtimit të Pronës. Hetuesit vlerësojnë se nga kryerja e një verifikimi të tillë do të kishte rezultuar se vendimet e paraqitura prej përfituesit të tokës ishin të falsifikuara.

Po ashtu, ka rezultuar se ish-drejtori Bardhyl Kapaj, kur ka kryer regjistrimin e një prej këtyre ngastrave, ka tejkaluar sipërfaqen e përcaktuar sipas vendimit të falsifikuar, duke sjellë përfitimin e një sipërfaqeje tjetër të konsiderueshme nga ana e K.H.

Ndërkohë, ish-drejtori Ertis Shehu dhe juristi P. Ç., kur kanë regjistruar këto pasuri, kanë ndryshuar zërin kadastral të sipërfaqes së regjistruar në pronësi të shtetasit K.H. dhe bashkëpronarëve të tjerë, nga tokë arë në tokë pa frut. Këtë ndryshim e kanë realizuar pa pasur një akt administrativ nga Këshilli i Ministrave, Ministria e Bujqësisë apo Drejtoria e Administrimit dhe Mbrojtjes së Tokës pranë Këshillit të Qarkut Fier.