Forcat izraelite do të zgjerojnë operacionet ushtarake në Rafah nëse pengjet e mbajtura nga Hamasi nuk kthehen deri në fillim të Ramazanit, tha të dielën ministri i kabinetit të luftës, Benny Gantz.
Muaji i shenjtë mysliman pritet të fillojë më 10 ose 11 mars dhe komentet e Gantz duket se janë afati më i qartë për veprimet ushtarake izraelite në qytetin jugor të Gazës, ku më shumë se 1 milion palestinezë të zhvendosur janë strehuar pranë kufirit egjiptian.
“Bota duhet ta dijë dhe liderët e Hamasit duhet ta dinë – nëse deri në Ramazan pengjet tanë nuk janë në shtëpi – luftimet do të vazhdojnë në zonën e Rafahut”, tha Gantz në një mbledhje të organizatave hebreje amerikane në Jerusalem,shkruan CNN.
“Ne do ta bëjmë këtë në një mënyrë të koordinuar, duke lehtësuar evakuimin e civilëve në dialog me partnerët tanë amerikanë dhe egjiptianë për të minimizuar viktimat civile.”
Izraeli ka thënë se planifikon të zgjerojë operacionet e tij tokësore në Rafah si pjesë e qëllimit të tij për të shkatërruar Hamasin pas sulmeve të 7 tetorit. Por ka shqetësime në rritje se rreth 1.5 milionë palestinezë të strehuar atje nuk do të kenë ku të shkojnë.
“Atyre që thonë se çmimi është shumë i lartë, unë ua them këtë shumë qartë: Hamasi ka një zgjedhje – ata mund të dorëzohen, të lirojnë pengjet dhe qytetarët e Gazës do të jenë në gjendje të festojnë festën e shenjtë të Ramazanit”, tha Gantz.
j.l./ dita
