Të paktën 1200 të vdekur e 5600 të plagosur është bilanci i bombardimeve izraelite në Rripin e Gazës, që nuk i lënë palestinezëve rrugë shpëtimi.
Të zhvendosurit, deri tani sipas Kombeve të Bashkuara, janë 340 mijë. Mes izraelitëve numërohen 1300 jetë të humbura; të plagosurit janë 3300. Ushtria e shtetit hebre po përgatitet për një operacion të mundshëm tokësor në Gaza, por liderët politikë atje nuk kanë vendosur ende për këtë çështje.
Të gjithë anëtarët e Hamasit do të asgjësohen, kërcënoi Benjamin Netanyahu, pas njoftimit se koalicioni qeverisës nën drejtimin e partisë së tij Likud ra dakord me politikanët e opozitës për krijimin e një “qeverie lufte”, një kabinet emergjence ku do të bëjë pjesë Netanjahu, kryeopozitari Benny Gantz Gantz dhe ministri i Mbrojtjes Joaw Galant. Ky forum do të jetë në pushtet për aq kohë sa të vazhdojnë luftimet me Hamasin në Rripin e Gazës.
“Ne po përballemi me një armik mizor, një armik që është më i keq sesa Shteti Islamik. Kemi parë fëmijë të vegjël të lidhur e të qëlluar në kokë, njerëz të djegur të gjallë, vajza të reja të përdhunuara e të masakruara, ushtarë më kokë të prerë. Ne do të luftojmë me të gjithë forcën tonë, në të gjitha frontet. Çdo anëtar i Hamasit është një njeri i vdekur. Hamasi është DAESH-i (ISIS) dhe ne do t`i shtypim e do t`i shkatërrojmë ashtu siç bëri bota me ISIS-in”, u shpreh Netanyahu.
Sulmet e mbrëmjes së djeshme treguan se Netanyahu po i bën realitet kërcënimet e tij. Ushtria izraelite ka goditur ashpër forcat elitë “Nukhba” të Hamasit, sidomos qendrat e tij të komandës së operacioneve të grupit islamik. Rrethimi i Gazës nuk do të hiqet deri në lirimin e të gjithë pengjeve izraelite, ndërsa avionët e saj po shenjtërojnë dhe rrjetin e tuneleve të përdorur nga militantët.
As energjia elektrike nuk do të kthehet, rubinetet e ujit nuk do të hapen, asnjë kamion nuk do të lejohet të hyjë deklaroi ministri i energjisë Israel Katz. Rreth 100 vetë u morën peng në Gaza gjatë sulmeve vdekjeprurëse të Hamasit. Kriza e Izraelit me pengjet po përshkruhet si makthi i çdo qeverie.
Mes lajmeve se ushtria izraelite po dërgon rezervistë edhe në kufi me Libanin, sytë po kthehen njëkohësisht edhe nga diplomacia me mbërritjen e sekretarit amerikan të shtetit Anthony Blinken në Izrael, ku pritet takimi i tij me Netanyahun e zyrtarë të tjerë izraelitë dhe familjarë të personave të rrëmbyer.
Blinken takohet nesër sipas raporteve edhe me presidentit e Autoritetit Palestinez në Bregun Perëndimor, Abu Mazen, rivali politik i Hamasit që kontrollon Rripin e Gazës.
