Në aeroportin Schiphol të Amsterdamit, mungesat e fuqisë punëtore vazhdojnë të ushqejnë kaosin e paprecedentë që filloi në pranverë, duke bërë që shumë udhëtarë të pyesin se çfarë ka ndodhur me një aeroport të konsideruar prej kohësh si një nga më efikasët dhe më të vlerësuar në Evropë, nëse jo në botë.
Aeroporti i treti më i ngarkuar në botë për numrin e pasagjerëve ndërkombëtarë në vitin 2021 ka vazhduar të zvogëlojë kapacitetin e fluturimeve, duke zemëruar linjat ajrore. Vala e fundit u kërkoi linjave ajrore të zbatonin reduktime deri në 22% të fluturimeve për sezonin e dimrit.
Linjat ajrore thonë se situata po dëmton rëndë reputacionin e tyre ndërkohë që pasagjerët janë të etur të udhëtojnë pas mbylljes si pasojë e krizës së zgjatur të Covid, por atyre u duhet të reduktojnë fluturimet.
Gjatë verës, disa linja ajrore, duke përfshirë Air Malta, TUI dhe Transavia, zgjodhën të zhvendosnin fluturimet nga Schiphol në aeroporte të tjera.
Më 15 shtator, Dick Benschop, president dhe CEO i Royal Schiphol Group, njoftoi dorëheqjen e tij pas akuzave për keqmenaxhim të aeroportit.
Mungesa e stafit që ka goditur të gjithë sektorin e aviacionit sidomos gjatë pandemisë, ka qenë veçanërisht problematike në Schiphol. Sfida u bë jashtëzakonisht e dukshme duke filluar nga 23 prilli, dita e parë e festave të pranverës në Holandë, kur ekuipazhi tokësor i KLM (Royal Dutch Airlines) hyri në grevë, duke shkaktuar përçarje të madhe.
Kaosi vazhdoi gjatë gjithë verës me mungesa për punonjësit e sigurisë. Çështja u lehtësua pjesërisht falë një bonusi prej 5.25 eurosh në orë që aeroporti zbatoi për punonjësit e sigurisë, gjatë fluksit të udhëtimeve, sipas Joost van Doesburg, drejtues i fushatës Schiphol për FNV, sindikata që përfaqëson rreth 40% të punonjësve të Schiphol.
Bonusi, megjithatë, nuk zbatohej për pastruesit e aeroportit, të cilët vendosën të bëjnë grevë në fund të qershorit, sipas agjencisë holandeze ANP.
Pasi bonusi u anulua pas sezonit të verës, siç parashikohej shumë punonjës u larguan në kërkim të punëve më të paguara. Si rezultat, radhët janë rritur sërish në Schiphol, veçanërisht në fundjavë.
Ndërkohë, pasagjerët mbeten të hutuar dhe të frustruar nga problemet e vazhdueshme.
“Është çmenduri që kjo nuk është zgjidhur,” thotë Fadi Bizri, një konsulent i kapitaleve dhe teknologjisë, i cili kaloi orë të tëra në linjat e kontrollit, sigurisë dhe kontrollit të pasaportave në Schiphol në të dy skajet e një udhëtimi të fundit pune nga shtëpia e tij drejt Bejrutit.
Bizri, i cili duhej të vraponte për të mbërritur 10 minuta para nisjes, e quan veten me fat që nuk e humbi fluturimin e tij. “Kisha vetëm një çantë shpine që të mund të vrapoja si i çmendur”, tha ai. “Unë nuk e di se si e bëni këtë me fëmijët, ose njerëzit që janë të moshuar që kanë kufizime fizike.”
Disa udhëtarë si Bizri, të cilët kanë përjetuar së fundmi kaosin e Schiphol-it, këshillojnë pasagjerët e tjerë që ta shmangin krejtësisht këtë aeroport. Ata rekomandojnë fluturimin nga aeroportet alternative, duke përfshirë Roterdamin e Hagës, ose aeroportin e Brukselit në Belgjikën fqinje, ose të udhëtoni me tren.
Por ata që nuk mund të shmangin Schiphol-in, mund të provojnë disa strategji që mund të minimizojnë telashet e tyre:
Faqja kryesore e aeroportit tregon si në një ditë normale, ashtu dhe të ngarkuar udhëtimi kohën e pritjes bazuar në informacionin specifik të fluturimit dhe vëren se pasagjerët janë “të mirëpritur” në aeroport katër orë përpara nisjes.
Disa tendenca të përgjithshme:
Të premteve deri të hënave janë përgjithësisht ditët më të mbushura me njerëz në aeroport, me radhë që vazhdojnë të krijohen më vonë gjatë ditës. Shumë anëtarë të grupit sugjerojnë gjithashtu marrjen e ushqimeve dhe pijeve në rast të një pritjeje të gjatë (stafi i aeroportit ndonjëherë ofron stroopëafel për pasagjerët në radhë, por jo gjithmonë). Rekomandohet gjithashtu të mos kontrolloni bagazhet.
Schiphol ka zbatuar gjithashtu një plan për të kompensuar pasagjerët për fluturimet e humbura dhe shpenzimet e tjera të shkaktuara nga radhët e gjata. Disa udhëtarë rekomandojnë që pasi të mbërrijnë në aeroport, pasagjerët duhet të bëjnë një selfie që dokumenton kohën në rast se një provë e tillë nevojitet për një kërkesë kompensimi.
