Ish-presidenti i SHBA-ve, Donald Trump ka krahasuar veten me Nelson Mandelën.
Në një postim të gjatë në Truth, rrjetin e tij social, ai akuzon gjyqtarin e Nju Jorkut Juan Merchan për shkeljen e të drejtave të tij.
“Nëse duan të më fusin në burg për të thënë të vërtetën, unë do të bëhem një Nelson Mandela i ditëve të sotme. Ne duhet ta shpëtojmë vendin nga këta zyrtarë politikë të maskuar si gjyqtarë dhe unë jam i gatshëm të heq dorë nga liria ime për këtë kauzë”, thotë ish-presidenti amerikan.
Trump i referohet urdhrit të vendosur ndaj tij nga gjyqtari për të mos sulmuar dëshmitarët dhe anëtarët e jurisë në gjyqin, i cili është planifikuar të hapet më 15 prill.
Donald Trump mblodhi 50.5 milionë dollarë në një ngjarje të organizuar nga miliarderi i fondit mbrojtës John Paulson në Florida. Shifra është pothuajse dyfishi i 26 milionëve të mbledhura nga Joe Biden me Bill Clinton dhe Barack Obama.
“Është më e qartë se kurrë që ne kemi mesazhin, operacionet dhe paratë për ta shtyrë Presidentin Trump drejt fitores më 5 nëntor”, tha në një reagim, zyra elektorale e Trump.
j.l./ dita
