Juventus vijon përgatitjet në vigjilje të ndeshjes së radhës në Serie A, atë ndaj Sassuolos. Bardhezinjtë do të tentojnë një tjetër fitore pas asaj me Lazion për të shtuar presionin në radhët e Interit që për momentin kryeson kampionatin me dy pikë më shumë se torinezët.
Por, tre ditë nga përballja me Sassuolon, lajme jo të mira vijnë nga kampi i Juventus teksa në seancën e fundit stërvitore kanë shfaqur shqetësim Alex Sandro dhe Adrien Rabiot. Të dy lojtarët janë detyruar ta ndërpresin para kohe stërvitjen, me Rabiot që mori një goditje nga Bremer ndërsa Sandro u pa duke çaluar.
Veç këtyre dy lojtarëve, trajneri Massimiliano Allegri duhet të bëjë llogaritë dhe me Chiesën e Vlahovic që u stërvitën veçmas grupit. Megjithatë, si Chiesa e Vlahovic priten në fushë ndaj Sassuolos me lojtarët që janë lënë enkas të stërviten pa shumë impenjim.
