Pas disfatës përballë Sevilla-s në gjysmëfinalen e dytë të Europa League, që fiku ëndrrat për një finale italiane në Budapest, Juventusi ndodhet në alarm, pasi pritet që të dënohet edhe me heqjen e 11 pikëve në Seria A.
Sipas kërkesës së prokurorisë federale FIGC që është zbuluar sot nga mediat italiane, nëse kërkesa për penalizimin e Juves do të pranohej, torinezët do të zbrisnin në 58 pikë në renditje, pas Romës në vendin e shtatë.
“Zonja e Vjetër” do të ishte -6 pikë nga Milani i vendit të katërt dhe për rrjedhojë larg një vendi në Ligën e Kampionëve sezonin e ardhshëm.
Dënimi me siguri do të jepet mbrëmjen e sotme dhe prej atëherë Juventusi do të jetë në gjendje të apelojë përsëri në Bordin e Garancisë së Coni.
Më 20 prill, Kolegji i Garancisë kishte anuluar dënimin me -15 pikë, duke ia referuar procedurën Gjykatës Federale të Apelit “në mënyrë që në një përbërje të ndryshme, të rinovonte vlerësimin e tij , veçanërisht në lidhje me përcaktimin e shkakut te drejtorët, duke ofruar arsye adekuate dhe duke zbuluar çdo pasojë në lidhje me sanksionin e vendosur ndaj Juventus”.
p.k\dita
