Në një objekt të madh gri pak jashtë qytetit të Gjermanisë Lindore të Dresdenit, siguria është e rreptë. Dera e madhe metalike që mbyll korridoret e bardhë të shndritshëm është i njëjti lloj i përdorur për të mbrojtur rezervat e arit të Gjermanisë. Pas saj, Demecan rrit kanabis për përdorim mjekësor, diçka që u bë e ligjshme në 2017. Siguria e rreptë është për faktin se droga klasifikohet si narkotike sipas ligjit gjerman.
Por nga 1 prilli, kjo do të ndryshojë, me një ligj të ri që dekriminalizon posedimin dhe kultivimin në shtëpi, një ndryshim që drejtori menaxhues Dr.Philipp Goebel shpreson të përfitojë. “Për ne ishte një lajm shumë i mirë kur u miratua ky ligj”, tha ai. “Tani na lejohet të kultivojmë më shumë kanabis, të cilin më pas mund ta shesim direkt në farmaci. Dhe pjesa e dytë, e cila është shumë e rëndësishme për pacientët, është se kanabisi tani është i deklasifikuar. Nuk është më një produkt narkotik, që do të thotë se çdo mjek tani mund ta përshkruajë atë në receta”, shtoi ai.
Sipas ligjit të ri, të rriturit do të lejohen të posedojnë deri në 25 g të drogës në publik, të mbajnë 50 g në shtëpi dhe të rritin maksimumi tre bimë. Nga korriku, “klubet e kanabisit” private mund të furnizojnë 500 anëtarë në një bazë të kufizuar. “Nuk është ligji që prisnim”, tha Steffen Geyer, aktivist i kanabisit për një kohë të gjatë dhe kreu i shoqatës së Klubeve Sociale të Kanabisit, “por është një ligj i mirë sepse do të kemi 180,000 më pak ndjekje penale vitin e ardhshëm”.
Ai shtoi: “Ky do të jetë një lehtësim i madh për konsumatorët e kanabisit. Mund të kesh 25 gr kanabis me vete pa pasur frikën e arrestimit dhe frikën e problemeve me policinë. Konsumatorët e kanabisit do të kenë një vend të ri në shoqërinë tonë. Nuk do të jemi më delja e zezë e komunitetit rekreativ.”
Për shembull, një person duhet të jetë mbi 18 vjeç dhe pirja e duhanit përreth zonave si këndet e lojërave dhe qendrat sportive nuk lejohet. Fuqia e THC, substanca psikoaktive që ka ndikimin kryesor te përdoruesit, do të jetë gjithashtu e kufizuar, veçanërisht për moshën nën 21 vjeç. Për të shmangur “turizmin e drogës” e vetmja mënyrë për të marrë kanabis rekreativ do të jetë kultivimi i tij në shtëpi ose nëpërmjet “klubeve të kanabisit”. Në të dyja rastet, njerëzit duhet të kenë qenë rezidentë në Gjermani për të paktën gjashtë muaj.
j.l./ dita
