Policia ka shpallur në kërkim rektoren e universitetit të Shkodrës, Suzana Golemi, e cila në bashkëpunim me një pedagoge të Universitetit, akuzohet se u merrte studentëve nga 150 euro, për të kaluar një provim. Pasi u pezullua nga detyra, tashmë Golemi bëhet me dije se është në kërkim, ndërsa pedagogia Donalda Laçej është vënë nën hetim nga policia vendore.
Fillimisht Suzana Golemi, Rektorja e Universitetit “Luigj Gurakuqi” në Shkodër, është pezulluar nga detyra për “shkelje të rëndë të ligjit”, pasi ajo u denoncua në emision investigativ, ku iu kërkonte lekë studentëve për të marrë provimet. Paraprakisht mësohet se Golemi është pezulluar nga detyra për një afat të pacaktuar, me vendim të ministres së Arsimit, Evis Kushi dhe kjo masë pritet të zgjasë deri sa të mbarojnë hetimet e policisë dhe prokurorisë për çështjen.
Denoncimi u bë nga emisioni “Stop”, ku u denoncua rektorja Golemi dhe pedagogia Donalda Laçej. Nga 120 studentë, 110 prej tyre rezultojnë se janë ngelës në lëndën e Bio-Kimisë. Ata që kanë mundësi ekonomike sipas denoncimit japin minimalisht 150 euro, për të marrë provimin. Njëri prej tyre i dha 150 euro Rektores dhe sipas bisedës së përgjuar mes tyre, ajo i garantoi kalimin në provim. Kaq mjaftoi që të merrej masa administrative e menjëhershme dhe çështja të referohet në Prokurori juridikisht.
