KRIMI DHE POLITIKA

Nga Bedri Islami

Botuar në DITA

Disa nga përgjimet e bëra tashmë publike, pra, të njohura për të gjithë, për shfaqin një gjendje të rënduar të politikës shqiptare, gjithnjë të lidhur me krimin, bandat e organizuara, figura të njohura të botës së nëndheshme, ndikimin e tyre në jetën politike, deri në dëshirën e fuqishme për të qenë pikërisht ato, bandat, sunduese të politikës.

Nga bisedat e bëra në një aplikacion të zbërthyer tashmë, dy figura të njohura të botës së nëndheshme në Shkodër, pikërisht në kohën kur ish ministri Beqaj emërohet si i deleguar politik i PS në qarkun e Shkodrës, bëjnë çdo gjë të mundur që të sundojnë mbi forcën e tij politike, shantazhojnë militantë të zgjedhur, quajnë fyerje të madhe që nuk janë pyetur për një gjë krejt të zakonshme, anatemojnë të deleguarin, dhe, në fakt, ia arrijnë që herë pas here të shfaqin forcën e tyre. Të mësuar për të bërë ligjin në një botë të errët, duan me çdo kusht dhe në çdo mënyrë që një forcë e caktuar politike të jetë e nënshtruar ndaj saj.

E njëjta gjë ka ndodhur edhe në krahun tjetër të politikës. Nganjëherë është shkuar edhe më larg se kaq. Përmes presionit të bandave janë emëruar deputetët e ardhshëm, janë hequr nga listat të pabindurit, nuk janë pranuar figura të shquara të mendimit politik dhe qytetar, si ishte rasti i Gilman Bakallit, janë larguar njerëz të ditur, si Romeo Gurakuqi për të ardhur anonimë , janë ngritur dosje fantazmë, që , edhe pse ishin të stisura janë afishuar pa asnjë droje ndaj dhimbjes që mund të shkaktojë përkohësisht te njerëzit.

Në çdo qark është folur për bandat e lidhura me politikën. Nuhatja e tyre për të shkuar nga pushteti është e fuqishme. Ata bëjnë të gjitha llogaritë e duhura, lëshojnë terren aty ku nuk ecin me forcë, si ishte rasti i Abdylajt në Durrës, pastaj rikthehen për të ushtruar presionin e tyre , gjë ë shpesh herë e bëjnë edhe përmes disa mediave të lidhr me to dhe që financohen prej tyre. Përgjime të zbardhura tani së fundi dëshmojnë se mjaft gazetarë, që në emisione të njohura duken si “ të ndershmit e botës”, në fakt janë financuar jo pak nga njerëz të bandave, nga figura që më pas u bënë drejtues të krimit, e jo vetëm nga Vis Martinaj, që vetëm në një vit ka financuar në shuma të mëdha gazetarë që sot janë në prehrin e opozitës, por edhe të tjerë.

Si u bë krimi palë me qeverisjen, me opozitën dhe me partitë politike? Përse tashmë bandat mafioze shqiptare zënë faqet e mediave të gjithë botës, edhe në ato vende ku fuqia e tyre është e pakët ose e pa përfillur?  

Pa asnjë droje se mund të më quajnë nostalgjik, e vërteta është se para vitit 1990 askujt nuk i shkonte mendja tek mafia shqiptare, familje mafioze, krim ekonomik, banda, oligarki financiare, ministra të super korruptuar, nëpunës me pasuri të jashtëzakonshme, presidentë që donin të vetëvriteshin si Allende, drogë dhe përleshje mes grupeve të ndryshme, vrasje në mesin e ditës, vrasje nga errësira, në rrugë, në makinë, në lokale, në shtëpi, nganjëherë edhe jashtë Shqipërisë; gjëma radhë pas radhe. nga njëri vëlla tek tjetri; deputetë që janë pjesë të bandave, që hetohen për pasuri të paligjshme, nisin sherret ,dhe që , pas sherreve, ose kanë fituar të drejtën e një licence, ose kanë marrë lejen e ndërtimit të disa pallateve; të panjohur që i futen politikës dhe largohen po ashtu, të panjohur, por të pasur, arrogantë dhe pa asnjë përgjegjësi shoqërore; askush nuk e ka menduar se mund të vijë një ditë dhe pas disa vrasjeve, nuk ka asnjë vrasës; që një bankier të vritet në mesin e ditës në hyrjen e bankës që drejton dhe kjo bankë është në mesin e Tiranës. Kush ka menduar se një deputet si Xhindi do të vritej dhe , me gjithë  premtimet e bujshme të ish ministrit të brendshëm të kohës, Nishani se, ishin shumë afër zbulimit të së vërtetës, gjithçka do të binte në heshtje. Xhindin e ndjerë tani pak vetë e kujtojnë, partia e tij thuaj e ka harruar.  Askush nuk do të kish menduar se një vit si ky i tashmi do të ishte i mbushur me kronikat e njëpasnjëshme të drogës që zihet, që kalon përmes detit , që bëhet mollë sherri për disa vende njëherësh dhe që, në harkun e pak viteve gjenden të arrestuar, në hetim disa ministra të kabinetit Rama, i cili vërtet po ngre godinën e një shteti modern, por korrupsioni brenda saj është “mos, oh Zot”!

Në atë kohë, pra, para vitit 1990, shteti bënte ligjin, të shtypte dhe të detyronte të mbyllje gojën, nëse nuk i bindeshe – të tregonte derën e burgut që ishte e rëndë e për disa nuk hapej më…të shkollonte, por edhe të tregonte se ku e kishe vendin…shumë nga vjedhësit ordinerë merrnin nga pas edhe një „ agjitacion e propagandë“…

Por banda nuk kishte. Në një regjim të lirë, ku është e lirë fjala, mendimi, jeta…, normalisht nuk duhet të ketë banda, ..në një vend ku shteti ka të gjithë mekanizmin në duart e tij, nuk duhet të ketë vrasje, ose fare pak; në një shtet ku ka edhe sot e kësaj dite, në emra të tjerë, sigurim të shtetit, polici, hetuesi, prokurori, gjykatë, Drejtësi të reformuar, SPAK, BKH, , ministër të brendshëm, kryeministër, president…ku bëhen përgjime të ligjshme e të pa ligjshme. Ku njerëzit e politikës më shumë përgjojnë njëri tjetrin se sa bandat, në fund të fundit duhet të ketë një fund kjo marrëzi që sot quhet..luftë mes bandave…, bandat që bëjnë lgjin në parti politike…, krim i organizuar…oligarki financiare…politikë e lidhur me krimin…parlament i kriminalizuar…familje mafioze… banda…

E gjithë kjo ka detyruar institucione të rëndësishme ndërkombëtare të flasin , ndoshta më haptas se asnjëherë tjetër se, në këtë vend, kështu si është ecur deri tani, nuk mund të bëhet më tutje. Kushdo që mund të mendojë se diplomacia ndërkombëtare flet ashtu se thjeshtë se është bërë traditë, janë të gabuar.

Ka dy gjëra në këtë mes: ose problemet janë thelluar ku nuk shkon më dhe kjo gjendje nuk mund t tolerohet më tej, ose, dhe kjo është më e hidhura, shteti i fuqishëm ka nisur të mendojë se strukturat e deritashme të shtetit shqiptar nuk janë në gjendje të luftojnë krimin, pasi, ose janë bërë pjesë me të, ose krimi i ka mposhtur.

Në shumë institucione të rëndësishme evropiane , ku trajtohen edhe problemet e shtetit shqiptar në çështje të sigurisë dhe të stabilitetit, shqetësimi është rritur dhe jo rastësisht qeverisë shqiptare i është përcaktuar njëra nga përparësitë e saj: mposhtja e krimit të organizuar.

Gjithçka mund të rëndohet në vitin e ardhshëm, si ndodh zakonisht në vitet e zgjedhjeve politike,

Nëse gjendja është kaq alarmuese, sa që për të trazimi është përhapur në dy kontinente, atëherë duket të ketë edhe përgjegjës për këtë. Kalimi i fajit tek qeveria Berisha është e patakt, e pabukë dhe hileqare, në mos kërkohet të tallet me inteligjencën e shqiptarëve.Përgjegjësia bie fillimisht mbi qeverinë…drejtuesi i saj është Edi Rama.

Ajo që ka premtuar dhe ajo që i kanë dhënë, një pushtet të koncentruar në duart e tij, kërkon një rrjedhë logjike të ngjarjeve…ose do të bëhen çfarë ka thënë, pa e detyruar askush, ose pas 11 viteve në pushtet ai do të jetë edhe një herë një rishtar në politikë. Asnjërën prej premtimeve të tij nuk mund të bartë, nëse nuk heq qafe bandat që e kanë „pushtuar“ politikën, jo vetëm tek kundërshtarët e tij politikë, por edhe brenda „ vathës“ së tij.

Deri më tani ai, megjithëse i takon së majtës progresive, është treguar i ashpër me të vegjlit dhe i dhembshur me të fuqishmit. I ashpër për një çati të ndërruar, dorëlehtë me milionat e avulluara nga hilet e profesionit.

A ka krimi një fillesë?

Ishte rastësi përhapja e tij dhe pse ai u bë kaq i fuqishëm , brenda pak viteve, sa që arriti të jetë njëri ndër „eksportet“ e njohura shqiptare? Ndoshta pak vetë e dinë, por në burgjet evropiane ka shumë më tepër shqiptarë , se sa vendas dhe mbi 90 për qind e tyre janë të lidhur me vepra të përbashkëta, që në shqip i quajmë banda?

Është e vërtetë se krimi dhe bandat nuk kanë ngjyrë partiake, por po aq e vërtetë është se bandat dhe familjet mafioze nuk mund të jetonin më gjatë nëse nuk kanë mbështetjen e politikës, nëse ata, sipas kohës së qeverisjes, nuk mbështeten një herë nga e majta dhe një herë nga e djathta.

Fillesa e krimit është kur ai u bë palë me politikën. Ajo që përcaktohet se nuk ka ngjyrë politike është vetëm pamja e jashtme, e vërteta që duket, ndërsa ajo që qëndron pas saj, zhytur si një ajsberg, është se pa mbështetjen e politikës asnjë bandë, asnjë familje mafioze nuk mund të jetonin kaq gjatë, sa që sot të cilësohet se familje dhe banda mafioze prej kohe janë shndërruar në pjesë të qeverisjes apo të pjesës më delikuente dhe të rrezikshme të opozitës. Struktura e ngritur nga sekretari i përgjithshëm i opozitës, bardhi, në emër të ruajtjes së votës, është dëshmi se politika e përdor krimin, e josh atë dhe lidhet me të deri në thelbin e veprimeve politike të saj.

Fillesa e lidhjeve mafioze politikë plus banda janë edhe fillesat e krimit në jetën tonë të përditshme. Mundet që më pas ata të dalin jashtë kësaj orbite, por sot për sot ata janë brenda saj.

Klanet mafioze të ngritura pranë PD-së, jo vetëm tani, por që në fillimet e jetës së saj politike, jo vetëm janë të njohura, por kanë emrin e tyre edhe në jetën e tashme. Më shumë se kaq, kanë diktatin e tyre. Ata, edhe sot e kësaj dite, kanë të krijuar rrjetin e tyre, fillimisht përmes „besnikërisë“ ndaj të parit të tyre, më pas, si ndodh gjithnjë, përmes lidhjeve financiare të fuqishme. Edhe sot e kësaj dite gjen rrallë ish shef e drejtor politicie  të asaj kohe që nuk ka në pronësinë e tij të paktën një restorant, që i ka bërë me „ rrogën“ e policit.

Disa prej tyre, me kalimin e pushtetit tek socialistët, ndërruan mend, u bënë forca goditëse të së majtës, e rritën pasurinë, ndonjëri u bë edhe deputet i saj, synoi edhe qeverinë, kur nuk iu desh më socialistëve kaloi përsëri nga e kishte nisur, si mund të ndodhë edhe më të tjerë.

Socialistët deri në vitin 1997 ishin , si të thuash, të imunizuar, nga prania e bandave të lidhura me të. Ndodhte kështu pasi, ajo fillimisht ishte paraqitur si një lëvizje politike e moderuar , dhe ashtu ishte, por edhe nga fakti se askush nga bandat që po krijoheshin nuk kishte interes të lidhej me socialistët, të cilët, si kishte deklaruar në Shkodër Berisha-president, nuk do të vinin në fuqi as për 50 vite! Cilës bandë i interesonte të lidhej me një forcë që për gjysmë shekulli nuk do e dinte se ku e kishte kokën e saj?

Socialistët e panë se nëse nuk do të bënin për vete disa nga këto të fuqishëm, do e kishin të vështirë të vinin në pushtet, pasi votat do u vidheshin përsëri, tensioni do të shtohej, njerëzit do të bliheshin e do të shiteshin përmes dhunës. Loja me pushtetin afroi „të fortët“ , të cilët, më pas, donin hakun e tyre.

Fillesa e botës mafioze në Shqipëri vazhdon të mbetet tek lidhjet e saj me politikën. Jashtë politikës ajo nuk ka forcë të veprojë për shumë kohë. Do të asfiksohej gradualisht dhe do të mposhtej.

E keqja qëndron se vetë familja politike e mban afër botën mafioze.

_____

©Copyright Gazeta DITA

Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016