Kriza politike dhe kushtetuese në Malin e Zi mund të çojë në bllokim të negociatave për anëtarësim në Bashkimin Europian.
Shqetësimi u nxit pas vizitës së ministres se jashtme sllovene Tanja Fajon, e cila njoftoi se shefat e diplomacisë së vendeve të bllokut do të diskutojnë më 23 janar në Bruksel, mbi masat e mundshme që mund të ndërmarrë blloku, nëse Mali i Zi nuk e zhbllokon Gjykatën Kushtetuese me zgjedhjen e gjyqtarëve që i mungojnë.
“Komisioni Evropian ose një e treta e anëtarëve të BE-së mund të rekomandojnë pezullimin e negociatave me Malin e Zi, ose të propozojnë kushte për vazhdimin e tyre”, tha Gordana Gjuroviq.
Një zyrtar i Bashkimit Europian, i cituar nga Radio Evropa e Lirë, deklaroi se Mali i Zi është ende në procesin e anëtarësimit, ku të gjithë hapat përcaktohen nga shtetet anëtare, së bashku me institucionet e BE-së.
Raportuesi i Parlamentit Evropian për Malin e Zi, Tonino Picula, thotë se pas paralajmërimeve të fundit nga BE-ja, Parlamenti i Malit të Zi ka mundësi të pastrojë një pjesë të rrëmujës dhe të krijojë rrethana që do t’i jepnin fund krizës së rëndë institucionale.
Megjithatë, kryeministri Abazoviç u shpreh skeptik lidhur me paralajmërimet e ministres sllovene.
Gjykata Kushtetuese e Malit të Zi është e bllokuar që nga shtatori i vitit të kaluar, kur ka mbetur me vetëm tre gjyqtarë nga shtatë sa duhet t’i ketë.
Për shkak të mungesës së kuorumit, ajo nuk mund të marrë vendime për ankesat kushtetuese, të cilat lidhen edhe me proceset zgjedhore. Pa vendimin përfundimtar të Gjykatës Kushtetuese, nuk mund të formohet asnjë qeveri e re pas zgjedhjeve.
