Pothuajse brenda natës, Kroacia është në krye, nëse jo “e para” për nga kostoja në Europë. Në tre muaj, praktikisht çdo gjë u rrit me të paktën njëqind për qind dhe disa produkte dhe shërbime deri në treqind për qind. Euro ishte një shkas, por edhe çmimet më të larta të energjisë në botë, por Kroacia, ndryshe nga vendet e tjera, pothuajse në mënyrë të pakontrolluar i lejoi të gjithë të ngrinin çmimet në qiell.
Çmimet e ushqimeve u rritën më së shumti, ndaj shitësit e tregut rrumbullakosën çmimet e tyre, pavarësisht kursit të euros dhe kunës së dikurshme. Asgjë nuk është më e lirë se disa euro, dhe para futjes së monedhës europiane, çmimet ishin disa herë më të ulëta. Restorantet janë shtrenjtuar në mënyrë drastike.
Adriatiku është veçanërisht i shtrenjtë, kështu që disa agjenci turistike gjermane, të cilat sollën më shumë turistë, rekomanduan zgjedhjen e një destinacioni tjetër përveç Kroacisë këtë verë. Të njëjtën qasje kanë dhe sllovenët që janë mysafirë të shpeshtë, të cilët raportojnë se çmimet janë dy herë më të larta se të tyret. Nuk ka restorant në Rovinj ku një vakt kushton më pak se 20 euro, kështu që një vakt i plotë për dy kushton më shumë se 100 euro.
Qeveria arriti vetëm të ndalojë çmimet e shfrenuara për produktet ushqimore dhe energjinë. Ky është edhe sekreti i mbijetesës së shumicës së qytetarëve, pagat mesatare të të cilëve janë më të ulëta se një vit më parë. Pensionistët morën kompensim energjie, por nuk mjafton për të përballuar shpenzimet për një muaj.
Qytetarët janë në prag të dëshpërimit, dhe thonë “se situata nuk është normale”. Tregtarët akuzojnë njëri-tjetrin, justifikohen me një zinxhir të mbyllur rritjesh të përgjithshme çmimesh dhe askush nuk e di se ku është fundi. Të pasurit mbijetojnë dhe të varfërit nuk mund të gjejnë më një model për të mbijetuar. Guvernatori i Bankës Kombëtare të Kroacisë shprehet se është e pasaktë të thuhet se anëtarësimi në eurozonë ka kontribuar në rritjen e normës së inflacionit. Nëse nuk do të ishim anëtarësuar, do të ishte më i lartë, jo më i ulët. Prandaj ai parashikon se nuk do të ketë recesion dhe kush do të durojë, do të durojë.
