“Të gjitha në një” (All in”) kështu u kodua operacioni i policisë së Vlorës që vuri në pranga pronarët e lokaleve në plazhin e Krorezës në Himarë të Vlorës.
Veç plazhit publik që kishin zaptuar me 90 çadra dhe 180 shezlongë pronarët e dy lokaleve në plazhin e Krorëzit u ofronin turistëve edhe kanabis të cilin e kishin mbjellur në territorin përreth. “Gjatë kontrollit të ambienteve të këtyre lokaleve dhe të territoreve përreth, u gjetën një sasi lënde narkotike cannabis sativa e ndarë në vazo dhe në qese, një sasi municioni luftarak dhe 89 bimë narkotike cannabis sativa” informoi sot policia.
Për këtë rast u procedua në gjendje të lirë, për moskallëzim të krimit, kamerier. Më tej, lënda narkotike, municioni luftarak, çadrat dhe shezlongët u sekuestruan në cilësinë e provës materialet, ndërsa bimët narkotike u asgjësuan nëpërmjet djegies.
Në vijim të këtij operacioni, policia konstatoi dhe një lokal tjetër ku ishte pushtuar hapësirë publike, me qëllim vënien e çadrave dhe shezlongëve, pa autorizim. Për këtë rast, u procedua penalisht administratori i këtij lokali, si dhe u sekuestruan çadrat dhe shezlongët
Për dy të arrestuarit Argjend Nanaj 28 vjeç dhe Ejkel Ismaili dosja i kalon Prokurorisë pranë Gjykatës së Shkallës së Parë të Juridiksionit të Përgjithshëm Vlorë
