Pipiria e Gjirokastrës ishte zhdukur prej vitesh, por sot ajo është vendosur në Qafen e Pazarit të qytetit të gurtë. Veshja e veçantë dhe tradicionale gjirokastrite u vodh nga muzetë si pasojë e ndryshimit të sistemeve dhe prej shumë vitesh ne e shihnim në muzetë e Greqisë, apo dhe të Londrës, por në Shqipëri nuk ishte.
Ministrja e Turizmit dhe Mjedisit Mirela Kumbaro tregoi se më në fund Pipiria u kthye në shtëpinë e saj, në Gjirokastër. Lizetës, një prej artizaneve duararta të Gjirokastrës, iu deshën tre vite për ta përfunduar me gjithë detajet e nuancat e holla, sipas një ekzemplari origjinal që e gjejmë sot vetëm në një fotografi dhe në ndonjë muze jashtë vendit.
“Mendova që t’i bëj Gjirokastrës dhuratë atë që i mungonte prej shumë vjetësh. Sepse vetëm një person si unë, me rrënjë gjirokastrite mund ta sillte më mirë. Është bërë nga material Kashmir i cilësisë së parë. Gjirokastra ka shumë Pipiri, ka pasur edhe më të thjeshta, por kjo ishte e shtresës me të lartë. Karakteristikën kryesore e ka te modeli u prerjes.”, tha Lizeta.
Ndërsa për ministren Kumbaro, kjo është një vepër arti dhe një punim shkencore.
“Lizeta kjo është një vepër arti. Unë e kuptoj që ti e ke bërë me pasionin e gjirokastrites dhe të artistes, por kjo është më shumë se kaq. Për mua është gati një punë shkencore. Unë uroj që Pipiria të jetë pjesë e sfilatës ne Festivalin e Gjirokastrës.”, tha Kumbaro.
m.b./dita