Në 27 shkurt në Bruksel, kryediplomati i BE, Josep Borrell ka ftuar në takim kryeministrin e Kosovës, Albin Kurti dhe presidentin serb, Aleksandër Vuçiç.
Shefi i delegacionit të Bashkimit Evropian në Serbi, Emanuele Giaufret, deklaroi ditën e sotme se në Bruksel do të diskutohet plani franko-gjerman për zgjidhjen e konfliktit mes Kosovës dhe Serbisë. Ai tha se liderët e BE-së kanë pritshmëri të mëdha për përparimin në procesin e normalizimit të marrëdhënieve të dy vendeve.
“Të gjithë liderët e Bashkimit Evropian (BE) kanë dërguar një mesazh shumë të fortë ditët e fundit se kjo është një mundësi historike dhe kjo është arsyeja pse ne kemi pritshmëri të mëdha që të mund të përparojmë në procesin e normalizimit dhe presim rezultatet e atij takimi”, tha ai.
“Në takim do të diskutohet për Propozimin e BE-së për normalizimin e marrëdhënieve ndërmjet Kosovës dhe Serbisë”, u tha ditë më parë në njoftimin për takim të BE-së.
Ndërkohë kryeministri i Kosovës, Albin Kurti ka shprehur dakordësinë e Kosovës për planin franko-gjerman duke refuzuar asociacionin e komunave me shumicë serbe.
o.j/dita
