Kryeministri Albin Kurti ka dalë përpara deputetëve të Kuvendit të Kosovës, ku ka bërë një kronologji të situatës në veri të vendit që nga tërheqja e serbëve nga institucionet e deri në incidentet pas betimit të kryetarëve të rinj.
Kreu i qeverisë së Kosovës lëshoi sërish kritika ndaj ndërkombëtarëve, të cilët sipas tij njohën zgjedhjet, por harruan të mbështesnin kryetarët e rinj, të cilët pas një rezultati të njohur, sipas Kushtetutës, duhet të nisnin dhe detyrën.
“Eskalimi i situatës më 29 maj ishte i planifikuar dhe kishte autorë. Ai ishte Beogradi zyrtar. Ngritja e shqetësimeve bëri që Serbia të angazhojë grupet kriminale që vërtetë ta eskalojë situatën. E kundërta duhet të ndodhte. Pas deklaratave mbështetëse për mbajtjen e zgjedhjeve dhe njohjen e rezultatit zgjedhor, duhej të mbështeteshin kryetarët e rinj. Ajo që mungoi ishte deklarata që të mos pengohet puna e kryetarëve të rinj deri në zgjedhje. Deklarata e munguar nuk i shërbeu situatës. Ne punuam sipas ligjeve të Kosovës. Kjo kronologji ka pasur bashkëpunim me ndërkombëtarët”, tha Kurti.
Kurti deklaroi në Kuvend se protestat e fundit në komunat e veriut kanë shërbyer vetëm për një gjë, që ka të bëjë me identifikimin e personave që i organizojnë ato, një pjesë e të cilëve me të kaluar kriminale.
Kreu i qeverisë i përmendi emër më emër serbët e dhunshëm dhe që financojnë protestat dhe kërkoi nga deputetët e kuvendit që të mbështesin Policinë e Kosovës e cila sipas tij është në një përballje me një milici fashiste.
“Është në dorën tonë beteja e radhës për sundim të ligjit dhe Kushtetutshmëri. Policia ka nevojë për mbështetje, jepjani këtë mbështetje. Mbështesni Policinë që është në vijë fronti me milicinë fashiste. Nuk jemi kundër serbëve, i kemi ftuar në institucione. Gabimin e Listës Serbe duhet ta paguajë ajo dhe jo ne”, u shpreh Albin Kurti.
j.l./ dita
